Notícies

An censurat un tutorial de maquilhatge qu’avisa de la repression dels oigors

Publicàvem dijòus passat l’informacion revelada per l’ICIJ, que raportava la repression esglasianta que la patisson los oigors per l’administracion chinesa, amb de sistèmas de susvelhança massissa amb intelligéncia artificiala, de detencions preventivas e de camps d’internament. Ara publicam una informacion restacada, d’una joventa estatsunidenca censurada sul ret social TikTok après avertir de la persecucion dels oigors, e mai amaguèsse sa denóncia jos un fals tutorial de maquilhatge.

Una gojata de 17 ans de Nòva Jersey, sonada Feroza Aziz, publiquèt dimenge passat sus son compte de TikTok una tièra de tres vidèos ont avertissiá dels camps d’internament ont China embarra e “educa” d’oigors dins la region de Xinjuan. Los oigors son un pòble originari de la region que parlan una lenga turquesa e practican l’islam sunnita.
 
Los vidèos d’Aziz se fasián passar per un tutorial d’adobament de las cilhas, mas tanlèu que començava las explicas esteticas, recomandava als espectators de s’assabentar de çò que “se passa en China, coma son los camps de concentracion ont menan de musulmans innocents separats de lors familhas, sequestrats, violats e obligats de manjar de de pòrc e de beure d’alcòl per se convertir a una autra religion". “S'o fan pas, çò disiá lo tutorial, seràn assassinats. Las personas que van dins aqueles camps de concentracion ne tornan pas vius. Es una autra Shoah, mas degun ne parla pas". Qualques jorns puèi, de milions de personas avián agachats los vidèos.

 

 

 

 
Mas TikTok reagiguèt en cancellant lo compte d’Aziz e en escafant los vidèos, çò que donèt mai de vam al messatge Feroza Aziz, qu’o raportèt sus Twitter ont tornèt publicar lo vidèo.
 

Hey guys my tik tok video has been going viral lately about what China is doing to Muslims in their concentration camps. Tik tok suspended my account for trying to spread awareness. Please keep sharing on here!! #tiktok #muslim

— feroza.x (@x_feroza) November 25, 2019
 
Enfin, dimècres passat los responsables d’aquel ret social se desencusèron e diguèron que la censura èra “a causa d’una error umana de moderacion” e restaurèron las publicacions censuradas.  Ça que la, la joventa ditz que crei pas las explicacions de TikTok.
 
 
Proprietat d’una societat chinesa
 
TikTok es un ret social que publica de vidèos corts e verticals qu’a fòrça succès demest los joves de la nomenada Generacion Z, nascuts après l’an 2000, que l’emplegan mai que non pas Instagram, Facebook o Youtube. Es proprietat d’una societat chinesa nomenada ByteDance e es estada criticada e multada als Estats Units per de problèmas de seguertat.
 
Dins lo cas de las protèstas d’Hong Kong, i a agut fòrça acusacions a TikTok d’aver censurats de conenguts de manifestacions prodemocracia.
 
De tot biais, TikTok es pas disponibla en China. Aquí ByteDance i a desvolopat una version domestica del meteis ret social nomenada Douyin.
 
 
 




 
 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies