Notícies

An ocupat una bastissa de 5000 m² per lotjar de sens papièrs a Perpinhan

Nòu còp d’efièch del Collectiu dels Sens Papièrs de Perpinhan dins lor lucha per la regularizacion dels migrants en situacion irregulara. Aperaquí un trentenat de personas lotjadas dins aquel nòu esqüat per respondre a la situacion d’emergéncia.


Quand fa a pena una setmana que lo procuraire retirava las cargas contra Denis L., acusat d’aculhir de migrants sens papièrs, lo Collectiu de Sens Papièrs de Perpinhan a tornat donar un còp d’efièch. Dijòus passat de matin se faguèt public, dins una conferéncia de premsa, l’ocupacion d’un nòu espaci a Perpinhan: una bastissa de 5000 m² dins lo quartièr de la gara. Aquel edifici qu’aculhissiá, fins a arunan, lo Centre de Formacion dels Aprendisses (CFA), una escòla de formacion professionala que se mudèt als entorns de la vila.
 
Es aital que lo collectiu ocupa çò qu’es lo cinquen espaci —que quatre son encara en foncionament— destinat a lotjar de sens papièrs en tot respondre aital a una situacion d’emergéncia. Gautier Sabrià, membre del Comitat de Sosten al Collectiu, declarava que “fòrça familhas amb de mainatges se tròban sens domicili après èsser lotjadas en d’organismes de sosten divèrses coma la CADA (Centre d’Aculhida de Demandaires d’Asil) o d’espacis qu’aculhiguèron de femnas maltractadas” pr’amor qu’aqueles organismes pòdon solament prepausar de sojorns de corta durada, çò qu’an denonciat un fum de còps la CIMADE, l’AST e lo quite Comitat de Sosten als Sens Papièrs. Los ocupants “son de familhas en situacion irregulara en territòri francés. Recebon pas cap d’ajuda economica e an pas drech d’exercir cap d’activitat professionala. Fa qualques jorns, se trobavan per carrièras en una situacion fòrça critica. L’ocupacion significa un melhorament de lors condicions de vida”, çò declara Sabrià.
 
Après l’ocupacion, sembla que s’es desplegada una estrategia de pression sus las familhas ocupantas e suls membres del Comitat de Sosten al Collectiu dels Sens Papièrs. D’un costat, tant la Polícia Nacionala coma la Polícia de las Frontièras son anadas dins l’immòble mai d’un còp per identificar las familhas e los militants presents. D’un autre costat, las responsablas de la Cambra dels Mestièrs (CDM), l’organisme que gerís lo CFA e la bastissa, s’i son presentats mai d’un còp e son arribats al ponch de menaçar grèvament per telefòn una de las militantas del Comitat. E mai, la CDM a talhat l’alimentacion electrica de la bastissa, çò que dificulta las condicions de vida dedins. Lor volontat es de deslotjar rapidament l’edifici perque allègan que la preséncia dels ocupants empedís la venda del bastiment, una venda que deu finançar las grandas reformas fachas a las nòvas installacions del CFA a l’entorn de Perpinhan.
 
En parallèl, la prefectura a dobèrt de dilligéncias contra l’ocupacion en allegant lo fach que dins la bastissa i a de material perilhós e de produches quimics que meton en risc la seguretat de las familhas ocupantas. Cal remarcar qu’una denóncia d’aquel tipe a travèrs d’una procedura d’urgéncia es una rason màger per accelerar l’enseguida dels migrants. Los ocupants, per contra, argumentan que las familhas son lotjadas per ara dins los ancians burèus ont i a pas res de perilhós e denóncian que la meteissa prefectura fa pas res per garentir de bonas condicions de vida a las familhas ocupantas.
 
A causa de la denóncia “exprès” de la prefectura, aqueste dimècres 29 de julhet se debanarà a doas oras lo jutjament contra las familhas e contra un dels membres del Comitat de Sosten. Tocant las familhas, la consequéncia pòt èsser lor expulsion forçada. E tocant lo militant, li demandan 12 000 èuros per aver participat a la dobertura de l’edifici lo jorn de l’ocupacion amb una carga de 50 èuros per jorn fins que partiscan. S’espèra de nòvas mobilizacions pendent los jorns que venon per exigir l’absolucion de las personas mesas en causa.
 
 
 
 
Pablo Bonat
Article paregut en catalan dins lo setmanièr Directa

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies