Las estonantas proposicions de renovelament de la bandièra neozelandesa

Lo primièr ministre neozelandés, John Key, anoncièt en octòbre passat que començava un procès referendari per decidir se se manteniá la bandièra nacionala actuala o se cambiava. Lo govèrn a dobèrt un sit web ont los ciutadans del país, e tanben d’endacòm mai, pòdon mandar de proposicions de dessenh: n’i a ja mai d’un milièr, qualques unas de reüsidas e qualques unas qu’o son pas tant.
 
I a de modèls dignes de dessenhaires e vexillològs d’expèrts, e tanben de dessenhs infantils e proposicions mai coriosas coma la de la bandièra amb còdi QR, la qu’a de formas geometricas, la d’omenatge a las fedas (omnipresentas suls camps del país) o aquesta version de la quebequesa. Demièg las mai curiosas, i a la version estil Nyan e aquesta bandièra emoticòna.
 
De totas las proposicions amassadas ongan, un grop de notables de la societat del país seleccionarà lo dessenh que li agrade mai e en 2016 se farà un referendum per elegir entre l’eventual modèl ganhant e la bandièra actuala, amb la constellacion de la Crotz del Sud e la bandièra del Reialme Unit al marge superior.

La Larada Arcencam festejarà sos quatre ans

La “Larada Arcencam” creada a Bornòs (Bearn) fa quatre ans, festejarà son anniversari lo 30 de mai que ven dins la comuna d’Aubin, dins lo canton de Tèsa.
 
Un tornèg de petanca, de conferéncias sus las experiéncias de las monedas localas animaràn l’eveniment que serà, de segur, una festassa gràcias als concèrts de Hilhas de Bigòrra, Abricots Verds, The Incredible Garuche Band, Lalame 6.4 e DJ Jèsus.
 
La “Larada” es una lar de joves autogerida que prepausa d’eveniments culturals, festius o socials dins de comunas de son parçan per lo far viure. Lo nom d’aquela «Larada» bearnesa es Arcencam, en onor del fabre dels dieus dins la mitologia pirenenca. “L’idea qu’ei vaduda mercés a l’influéncia de las experiéncias bascas (Gaztexe) o catalanas (Casals de joves) shens copiar aqueths modèus. La Larada qu’a la soa identitat, los sons objectius e lo son foncionar pròpis”, çò contava a Jornalet, fa quatre ans, Julian Cabarry, un dels iniciators. “La Larada qu’ei bilingua, mixta e qu’arrefusa las discriminacions de tota traca. Despuish la soa creacion, la Larada qu’estó presenta sus 7 comunas deu Nòrd Biarn dab repaish, concèrts, difusion de filmes, batalèras…”, çò precisava.
 
Lo jorn de la fèsta a Aubin, se mercejarà totes los sòcis o pròches de l’associacion que sostenon lo projècte, “en esperar la vaduda d’autas Laradas per Bearn, Gasconha e perque pas per Occitània tota”.

Es mòrt Dean Potter, l’esportiu mai extrèm

Dean Potter, un dels melhors escalaires del moment, moriguèt dimenge mentre que practicava lo saut BASE al pargue nacional de Yosemite, als Estats Units. Potter, de 43 ans, e Graham Hunt, de 29, sautèron dins lo voide dempuèi mai de 2000 mètres de nautor sus la val de Yosemite près del massís rocalhós del Capitan. Portavan los nommats “wingsuits”, çò es de vestits dessenhats per planar, mas sembla que volguèron passar per una gòrja fòrça estrecha e s’esclafèron contra la ròca. Potter aimava los espòrts extrèms e cercava totjorn de nòvas frontièras e de provocacions. Cal dire que lo saut BASE es una practica enebida al pargue de Yosemite.
 
Prepausam çai jós qualques unes dels vidèos mai espectacloses de las aventuras de Potter:
 
 

 
 

 

 

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies