An fach las “reflexions collectivas necessàrias” per repensar l’occitanisme

Aperaquí  dos centenats de personas se son amassadas aquesta dimenjada passada a Pòrt Leucata (Corbièras) dins un eveniment nomenat “la Dintrada” (“la Rintrada”), que passarà l’istòria coma lo moment que l’occitanisme s’amassèt amb d’expèrts dels movements socials e politics d’Occitània, Bretanha, Arpitània e Catalonha per far de “reflexions collectivas necessàrias”. L’eveniment es ben estat “un moment per aprene, partejar e fin finala comprene cossí podèm èsser occitans dins un mond qu’es acarat a tantas crisis (climatica, economica, politica, culturala)”, coma o anonciavan los organizaires.
 
Coorganizada pel Partit Occitan (PÒC) e l’Aliança Liura Europèa (ALE), e amb lo sosten del Parlament Europèu, l’universitat politica d’estiu auriá ben reüssit la tòca de “ganhar la dignitat en bastir un projècte per nòstre país”, segon çò que vesèm suls rets socials amb l’etiqueta #ladintrada.
 
En dos jorns se son succedits fòrça debats qu’an analisat l’encastre politic europèu, l’agricultura duradissa en Occitània, lo ròtle dels mèdias, los enjòcs institucionals amb la conscientizacion occitana, d’experiéncias ciutadanas dins la crisi politica, l’ofensiva occitanista davant la ratificacion de la Carta Europèa de las Lengas Regionalas o Minoritàrias, l’activacion de la mobilizacion occitana, la formacion d’activistas, e mai divèrses de projèctes politics. Tot aquò acompanhat d’animacions, de bons repaisses e d’una serada festiva.
 
Demièg los expèrts qu’interverguèron a l’eveniment podèm remarcar l’èx-vicepresident del Parlament Europèu e candidat a las eleccions regionalas per la granda nòva region del centre d’Occitània e Catalonha Nòrd, Gérard Onesta; lo deputat catalan Jordi Solé; l’eurodiputat roergàs José Bové; l’editor de France Televisions Jean-François Tealdi; lo senator aranés Paco Boya; lo conselhièr d’Aquitània Dàvid Grosclaude; Enzo Lesourt, conselhièr muncipal de Grenòble; Patric Roux, èx-director de l’Estivada de Rodés; Anne-Marie Hautant, conselhièra municipala d’oposicion a Aurenja; los jornalistas occitans Beneset Roux, Joan-Pèire Laval, Guilhem Gratiolet; e quitament lo capredactor de Jornalet, Ferriòl Macip.
 
L’organizacion de “la Dintrada” a anonciat que los debats son estats enregistrats e que seràn lèu disponibles.
 
 
 
#ladintrada tuits

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies