Li tornan sa valisa après escafar las fòtos de sa camèra que i aviá lo drapèl independentista catalan

La societat d’aviacion Iberia perdèt la valisa d’un jornalista catalan. La li tornèt doas setmanas puèi. Lo jornalista descobriguèt qu’avián escafat las fòtos de sa camèra que contenián l’“estelada”.

Lo jornalista catalan Xavier Escuder, que trabalha a Catalonha Ràdio, passèt doas setmanas de sas vacanças en Cuba. Tornèt lo 3 d’agost, faguèt correspondéncia a Madrid e arribèt a Barcelona lo 4. La societat d’aviacion Iberia li aviá perdut las doas valisas. Una d’elas Escuder la recuperèt tres jorns puèi. Mas l’autra, ont portava sa camèra fòto, li la tornèron lo 18 d’agost. Escuder remarquèt que la valisa aviá un adesiu qu’indicava qu’aviá volat lo 17 d’agost de Madrid a Barcelona, es a dire, que sa valisa èra demorada doas setmanas perduda endacòm dins la capitala d’Espanha. L’estonament foguèt de constatar qu’avián embalat la valisa amb d’escòch de color marron après levar lo plastic amb lo qual el aviá embalat la valisa a l’Avana. Dins la valisa i mancava pas res, mas quand agachèt las fòtos de sa camèra, vegèt qu’avián escafat totas las fotografias qu’Escudé i pareissiá amb un drapèl independentista catalan, la dicha “estelada”.
 
Aital o expliquèt sus Catalonha Ràdio.
 

 
 
E aital o expliquèt sus son compte Facebook.
 

 

A veure, resumeixo el cas que he estat explicant fins ara per si el voleu difondre.Aquest estiu he anat 15 dies a…

Posted by Xavier Escuder Soler on dijous, 20 / agost / 2015

Kosova e Serbia signan quatre acòrdis per normalizar las relacions

La cap de la diplomacia europèa Federica Mogherini anoncièt dimars passat la signatura venenta de quatre acòrdis entre Kosova e Serbia, que representan lo pas endavant mai seriós per la normalizacion de las relacions entre los dos estats e lor possibla incorporacion dins l’Union Europèa.
 
Los presidents de Kosova e de Serbia, amassats dimars a Brussèlas, s’acordèron per crear una zòna autonòma sèrba dins Kosova, dins la region del nòrd ont la majoritat es sèrba. Aquela zòna autonòma serà somesa a la legislacion kosovara, mas benlèu Serbia finançarà l’activitat de las institucions.
 
Dos autres acòrdis fan referéncia a l’energia e a las telecomunicacions. Serbia a acceptat que Kosova obtenga un prefixe telefonic d’estat, lo +383. Serbia a lo +381 e fins ara los telefòns mobils de Kosova devián foncionar en emplegant de còdes estatals d’Eslovènia o de Mónegue, qu’avián acordat la cession d’aqueles còdes al govèrn kosovar.
 
Fin finala los dos govèrns se son acordats per un reglament d’usatge del pont de Mitrovica. Aquel pont separa las comunautats albanesa e sèrba e es estat lo luòc d’incidents fòrça serioses dins los darrièrs ans. Ara los dos govèrns s’engatjan a lo manténer dobèrt e a ne crear un protocòl d’usatge.
 
Los dos estats an considerat que los acòrdis èran una victòria. Serbia soslinha l’autonomia obtenguda pels sèrbes, del temps que Kosova remarca que, en signant aqueles acòrdis e en acceptant lo nom de “Republica de Kosova” per lo primièr còp Serbia n’a reconegut l’independéncia de fach.
 
 
UNÈSCO e Interpòl
 
Per las autoritats kosovaras l’acòrdi es un pas de mai endavant per obténer una reconeissença diplomatica totala. Kosova es ja un estat reconegut per la majoritat dels estats membres de l’ÒNU, mas encara ne fa pas partida. Pasmens, lo mes que ven presentarà la candidatura per far partida de l’UNÈSCO e d’Interpòl, e a fòrça possibilitats de ben capitar perque quitament lo Conselh de Seguretat de l’ÒNU o vei plan positiu.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies