Alidé Sans au licèu de l’Isla de Baish

Après repeticions e repeticions començadas a la prima de 2013, concèrts a fanègas e un pilòt de jorns d’enregistrament dins estúdios, le CD d’Alidé Sans arribèc. I collaborèn tanben liceans de la Gasconha tolosana. Aqueste CD estèc un afar deus bères. Au-delà deu hèit que la musica e les tèxtes estossen tots de la joena aranesa, participacions multiplas estón audiblas suu CD dambe Crazy Álvarez, Nedson Pires, Toni Xuclà e 5 liceans lisleses. Caloc quasi dus ans ende hèr espelir le CD. Estèc enregistrat a Barcelona e a Madrid dambe l’ajuda de professionaus confirmats.
 
L’idèa èra de mostrar que joens podèvan hèr una cançon en occitan maugrat que vengossen d’Estats diferents. S’agissèva de provar que l’occitan mos unís. La region Miejorn-Pirenèus comprengoc aquera pensada novatora e sostengoc le projècte. La cançon qu’Alidé e les liceans enregistrèn amassas, e que se tròba sus l’album, es una represa de las peberadas deus Caulets. Les liceans que participèn au CD d’Alidé Sans son Anaïs Gaux (votz), Lisa Fraresso (flaüta traversèra), Sofia Monteil (teclat), Edith Séguier (Bateria) e Antoine Finòs (Baisha).
 
Le CD d’Alidé Sans s’apèra “Eth paradís ei en tu”. Dejà CDs se venen a la fin deus concèrts. Serà distibuit per Karonte, un distributor madrilenc, a la fin de la prima. A l’Estat francés, serà disponible a la venta a partir de junh que veng per Harmonia Mundi.
 
Quasi un centenat de soscriptors, que passèn per l’associacion País de Catinon de Sent Lis, avón le privilègi de l’aver a la debuta de mai. Les autes pacientaràn un mòs ende un CD, tot en occitan, d’estille soul, romba e reggæ.
 
Alidé Sans venguerà au rescontre deus liceans, le divendres 22 de mai de 14:30 a 16:30 ende presentar le son CD. Explicarà la collaboracion dambe les liceans deu cors d’occitan. Puèi la joena aranesa cantarà, pendent la recreacion de 15:30, unas creacions ende botar en musica le son prepaus sur le prumèr CD. L’entrada es liura e gratuita a tots, dins la mesura de las plaças disponiblas. Sufís d’anonciar la vòsta venguda au +33 (0)6 23 47 46 43.
 
 
 
 
Nicolau Rei Bèthvéder
 
 



Barcelona TV – #aranésòc. Presentacion del disc d’Alidé Sans
 

 

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies