Avètz cambiat l’ora?

Un còp de mai, nos an fach retardar d’una ora los nòstres relòtges e mòstras per intrar dins l’orari d’ivèrn. Aital, a tres oras d’aqueste matin passat, son estadas tornarmai doas oras. Aquò permet d’aprofechar las oras de solelh del matin e aital d’estalviar d’energia, çò dison.
 
Las mòstras e los relòtges se mòvon a l’encòp gaireben dins tota Euròpa. Aquò comencèt de se far a partir de la crisi del petròli de 1973, quand qualques païses decidiguèron de cambiar l’orari per aprofechar la lutz del solelh e consumar mens d’electricitat. Dempuèi 1981 aquel cambiament orari es una nòrma de l’Union Europèa.
 
Amb aquesta practica, l’ora oficiala es dins l’estiu de doas oras de mai que l’ora solara, mentre que dins l’ivèrn es d’una ora de mai.

La Comission Europèa a aprovat la supression del cambiament d’ora mas la comission de transpòrt e de torisme del Parlament Europèu a daissat als païses membres de l’UE fins en 2021 la decision de servar l’ora d’estiu o la d’ivèrn.

 

En blau: païses ont se fa lo cambiament d’ora. En irange: païses ont lo cambiament d’ora se fa pas mai. En roge: païses ont s’es pas jamai fach 
© Paul Eggert

 

Tolosa: de rires perque un elegit saluda en occitan

Lo conselh municipal de Tolosa del 8 d’octòbre passat adoptèt un vòt en favor de l’ensenhament de l’occitan dins l’educacion publica, a la proposicion de l’elegit Jean-Michel Lattes del grop Aimar Tolosa. Pasmens, dins lo debat se visquèt un episòdi d’occitanofobia: quand l’elegit faguèt sa saludacion en occitan d’unes s’escacalassèron amb mesprètz. De veire dins lo vidèo de la sesilha a partir de la 5a ora 56a minuta. En seguida ne reprodusèm l’extrach.
 
E mai lo vòt foguèsse adoptat, las intervencions dels conselhièrs municipals contraris a l’ensenhament de l’occitan argumentèron que sèm a de “moments dificils per l’unitat e indivisibilitat de la Republica [francesa]” e que “los particularismes” la meton en dificultat e “mancan al respècte envèrs lo francés”.

 
 
(De veire tota la sesilha sus aqueste ligam.  L’intervencion de Lattes es a partir de la 5a ora 56a minuta)
 

 

 
 

 

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies