Incursion militara turca en Siria per repatriar la tomba de Süleyman Şah e los soldats que la susvelhavan

Sens cap de preavís, l’armada turca menèt dimenge de matin una incursion en territòri sirian per repatriar un quarantenat de soldats turcs que susvelhavan la tomba de Süleyman Şah, lo grandpaire del fondador de l’Empèri Otoman. De centenats de soldats d’elèit, acompanhats d’un centenat de veïculs militars e de tancs, avancèron fins al mausolèu, que dempuèi 1921 fa partida de l’estat turc en seguida d’un tractat internacional. Dempuèi, lo sit èra susvelhat per de soldats turcs e s’òrna de la bandièra turca.
 
Segon las autoritats turcas, l’operacion se menèt a tèrme sens cap d’afrontament armat amb cap de faccion de las que luchan en Siria, e mai s’un soldat moriguèt a causa d’un accident.
 
Dempuèi que comencèt la guèrra en Siria, fa quatre ans, Turquia a avertit que protegiriá aquela enclava territoriala de qualques mètres cairats dins lo nòrd de l’estat sirian, amb los soldats que la susvelhan. Ara que l’Estat Islamic menaça l’endrech, l’estat turc a repatriat las relíquias de Süleyman Şah e a destruch lo mausolèu.