Los salaris de las femnas son inferiors als dels òmes

Los salaris de las femnas en Occitània son inferiors als dels òmes. Segon un rapòrt que l’a publicat l’Eurostat, las femnas an recebut en 2013 una mejana d’un 15,2% de mens dins l’estat francés, d’un 19,3% de mens dins l’estat espanhòl e d’un 7,3% de mens dins l’estat italian. Lo rapòrt presenta pas las donadas de Mónegue.
 
A respècte de tota l’Union Europèa, los salaris de las femnas son d’un 16,4% inferiors als dels òmes per ora trabalhada. Poiriam dire qu’aquela diferéncia se redutz modèstament se prenèm en compte qu’en 2008 la diferéncia èra d’un 17,3%.
 
La diferéncia salariala entre sèxes supèra lo 20% en Estònia (29,9%), Àustria (23%), Chequia (22,1%) e Alemanha (21,6%). Demièg los estats amb mai d’egalitat salariala de l’Union Europèa, i a Eslovènia (3,2%), Malta (5,1%), Polonha (6,4%) e Itàlia (7,3%). L’aument de la diferéncia salariala entre 2008 e 2013 a crescut notablament en Espanha (+3,2 ponches), Portugal (+3,8 ponches), Letònia (+2,6 ponches), Itàlia (+2,4 ponches) e Estònia (+2,3 ponches).
 
Malgrat la distància salariala, lo rapòrt mòstra que las femnas an un nivèl d’estudis mai naut que los òmes. Cal soslinhar que lo 60% dels diplomats academics son de femnas. Per contra, lo rapòrt met en evidéncia que las femnas son fòrça mens representadas en los sectors de las sciéncias, la tecnologia, l’engenhariá e las matematicas. Tanben i a d’inegalitat dins los afars, ont solament lo 25% de las femnas son representantas als conselhs de societats, e per contra son gaireben la mitat de la man d’òbra (46%).


Declaracion del Parlament de Catalonha per l’egalitat de salaris entre òmes e femnas