An lançat de bilhets sus la cara de Blatter lo jorn qu’anóncia que serà pas mai president de la FIFA

Après anonciar sa demission al començament de junh, e dins l’encastre d’un escandal de corrupcion, lo president de la FIFA, Joseph Blatter, anoncièt diluns passat que se presentariá pas a l’eleccion del 26 de febrièr que ven. Après fòrça annadas de presidéncia, Blatter anóncia que tornarà pas. La conferéncia de premsa visquèt un moment intens quand una pluèja de bilhets de dolars tombèt sus Blatter. Simon Brodkin, un comic britanic, protestèt aital pels escandals de corrupcion.
 
Lo comic, mai conegut per l’escais de Lee Nelson, faguèt semblant d’èsser un jornalista per intrar dins la sala de premsa. Quand foguèt dedins cridèt: “Vaquí l’argent per que la Corèa del Nòrd organize lo Mondial de 2026”, en fasent referéncia a las acusacions de subornacion que la FIFA a recebut darrièrament, sustot dins los cases de Russia per 2018 e de Qatar per 2022. Los bilhets tombèron sus Blatter.
 
La conferéncia se suspendèt un brieu, e quand recomencèt, Blatter faguèt l’anóncia: “Lo 26 de febrièr la FIFA aurà un nòu president”, çò diguèt lo soís de 79 ans. “Cresi que tornarai al mieu ancian trabalh, qu’èra coma lo mieu passatemps. Èri jornalista”. Serà proable dins l’encastre de la ràdio “pr’amor qu’es mai aisit de parlar que d’escriure”, çò apondèt.

L’occitan present al Congrès Universal d’Esperanto

Del 25 de julhet al 1r d’agost se debanarà a Lilla lo 100n Congrès Universal d’Esperanto. Es de notar que lo primièr se passèt en 1905 a Boulogne-sur-Mer e que los organizaires o an volgut commemorar, per la centena edicion, dins la meteissa region.
 
Mai de 2500 personas d’81 païses son ja inscrichas. Lo programa cultural e sustot musical foguèt fisat a Floreal Martorell que demòra al ras de Tolosa (Dònavila) e qu’apitèt lo famós labèl de musica esperanto Vinilkosmo: aqueste produtz de grops e de cantaires del Mond sencer que s’exprimisson dins la lenga internacionala creada en 1887 per Ludwik-Lazar Zamenhof dins la vila de Białystok, ara en Polonha.
 
Los espectacles veiràn se produire d’artistas venguts, en mai de l’estat francés, de Còngo, dels Païses Basses, de Polonha, dels Açòres, d’Alemanha, de Japon, d’Itàlia, de Veneçuèla, d’Ongria, de Belgica, de Suècia, de Russia, de Lituània e d’Hong Kong.
 
Occitània serà plan representada per doas formacions. La primièra s’apèla Maragane, un grop peiregòrd de musica tradicionala de dançar que compta una sansònha, un violon, una contrabassa e un acordeon. An produch un CD en esperanto dins lo qual se pòt ausir La mazurca del lanternaire jos lo títol La lanternisto.
 
La segonda formacion que portarà las colors occitanas serà Brankabodegaires amb tres bodegas, un tambor en un banjo. Un album de musica occitana es en preparacion en cò del labèl Vinilkosmo. Lo ligam se fa pel cantaire Joan-Marc Leclercq, conegut en defòra dels legeires del Jornalet dins lo mond esperantista jos lo chafre jOmO. Es a botar la darrèra man a un libròt d’aprendissatge de l’occitan destinat als aprenents esperantofòns.
 
Cal notar l’abséncia ongan de la formacion dels catalans de Kaj Tiel Plu, autora de tres albums de musica tradicionala occitana, catalana e sefardita sul meteis labèl Vinilkosmo.
 
Los concèrts, dobèrts a totes, se debanaràn mai que mai a la Gara Saint-Sauveur de Lilla.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies