Helly Luv, la diva curda del pòp qu’encanha l’Estat Islamic

Helly Luv es una cantaira pòp de Curdistan, una de las divas mai aimadas e tanben una de las mai asiradas e recercadas per l’Estat Islamic. La còla de Play Ground Magazine son anats parlar amb ela.
 
Nascuda Helan Abdulla, Helly Luv es originària del Curdistan iraquian, nasquèt en 1988, en plena guèrra Iran-Iraq. Sa maire èra una guerrilhièra peshmèrga que luchèt “per la libertat de Curdistan”. Lo paire e lo pepin tanben. “La miá familha deguèt fugir Saddam Husayn e anar en Turquia. Foguèrem doas setmanas a demandar la caritat e en dormissent per las carrièras turcas. Passèrem 9 meses dins un camp de refugiats, fins que nos acceptèron l’asil politic en Finlàndia”, çò explica.
 
Helly Luv e sa familha foguèron los primièrs curds que visquèron en Finlàndia ont foguèt victima del racisme, çò qu’aluquèt la flama de sa carrièra artistica. “Totes èran blonds e amb d’uèlhs blaus, ieu èri la sola diferenta”. Ailà comencèt de cantar e dançar. “A l’escòla me perseguissián, mas sus scèna òm m’aimava”.
 
Dins sos 18 ans viatgèt a Los Angeles (Estats Units) per far carrièra dins lo mond de la musica e vesitèt totes los ostals de disques que poguèt. E mai s’obteniá pas res e s’èra a mand de se’n tornar en Finlàndia descoratjada, lèu un messatge sus MySpace —un portal per partejar de musica pensat pels artistas— cambièt sa vida. Un productor de disques de Nòva York li daissèt un numèro de telefòn, e ela telefonèt e li cantèt I Have Nothing de Whitney Houston. Lo productor la convidèt a Nòva York e comencèt una carrièra musicala reüssida.
 
 
De videoclips per internacionalizar la lucha del pòble curd
 
Al començament de 2014 faguèt lo videoclip de son tèma Risk It All. Lo vidèo, enregistrat amb de refugiats curds de la guèrra de Siria, mòstra l’artista a dançar d’un biais sèxi sus un leon, amb de desenats de bandièras curdas al vent. Foguèt una reüssida. “Es un vidèo sus la nòstra libertat. Totes los curds avèm lo meteis pantais: l’independéncia de Curdistan”. Aquel videoclip li portèt las primièras menaças de mòrt de la part d’integristas islamics.
 

 
 
Quand l’Estat Islamic ataquèt Curdistan, Helly se remembra qu’“alavetz las gents normalas, las gents que trabalhan en vendent de noiridura, anèron al front per combatre l’Estat Islamic”. “La nòstra resisténcia fàcia a l’Estat Islamic aviá pas pro d’atencion internacionala. Pr’amor d’aquò enregistrèri ma cançon seguenta”.
 
La cançon, entitolada Revolution, s’enregistrèt a Mossol, a dos quilomètres del front de guèrra amb los islamistas. Tres meses demorèron per enregistrar aquel videoclip. “Foguèt fòrça complicat. Començàvem d’enregistrar e cinc menutas puèi plovián de balas de l’Estat Islamic”, çò explica. “Los peshmèrgas qu’apareisson dins lo vidèo son de guerrièrs reals que combaton dins la zòna contra l’Estat Islamic. Enregistravan dins lor temps liure”.
 
 

 
 
A l’Estat Islamic li agradèt mens encara aquel videoclip. “Cresi que soi la femna mai recercada, mas ai pas paur, sabiái qu’aquò se passariá. Se ma votz capita a arribar a de milièrs de personas de tot lo Mond e s’aquò met ma vida en risc, es ben. Es per ieu un privilègi, un onor”.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies