Notícies

Bayer afirma qu’èra “pas al corrent” de la lista de Monsanto

Segon de revelacions fachas per France 2 divendres passat, Monsanto auriá engatjat de centenats de personalitats de l’estat francés per que defendèsson publicament l’emplec dels pesticidas, especialament del glifosat. Ara, la societat quimica alemanda, Bayer, proprietària de Monsanto dempuèi 2018, ditz qu’èra “pas al corrent”, e o justifican en disent qu’aquela lista seriá estada realizada en 2016, “data que Bayer e Monsanto èran dos grops independents”.
 
France 2 a raportat que recebèt de documents informatics “confidencials” amb la signatura d’agéncias de comunicacion que trabalhan per Monsanto. Dins un primièr document, de 2016, una cartografia amb lo lògo de Monsanto e de Publicis renga los principals actors del debat suls pesticidas en França en foncion de lor capacitat d’influéncia sul public. Puèi, l’agéncia de comunicacion Fleishman Hilland “auriá emplegat un autre fichièr” que conten en particular las adreiças privadas e los numèros de telefòn de 200 personalitats.
 
Aquel segond document “avalora sus divèrsas tematicas, d’OGM e de pesticidas amb de ponches de 0 a 5 en foncion de la credibilitat, de l’influéncia e del gra de sosten a Monsanto”, çò ditz lo reportatge de France 2.
 
Un autre document es una tablèu que senhala 74 “objectius prioritaris” classats en 4 grops: los “aliats”, los “potencials aliats a engatjar”, las personalitats “a educar” e las que son “a susvelhar”.
 
Dins aquelas listas se mençonan de jornalistas de Le Monde, Le Parisien e Ràdio France. Ara, aqueles mèdias an dich que farián lor denóncia a la Comission Nacionala d’Informatica e de las Libertats (CNIL) per un emplec illegal de lors donadas. E mai pensan de far tanben una denóncia davant la justícia francesa. De son costat, Fleishman Hillard a assegurat que “respècta las leis en vigor” e l’etica.
 
Segon lo reportatge de France 2, l’èx-ministra de l’environament, Ségolène Royal, èra rengada coma persona “a susvelhar” a causa de son inclinacion a enebir lo glifosat.
 
Lo glifosat es l’erbicida pus emplegat dins lo Mond. Lo Centre Internacional de Recèrcas sul Càncer, que fa partida de l’OMS, lo considèra cancerigèn. Es comercializat jos divèrsas marcas dont la pus coneguda es Roundup.
 
 





 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies