General

Besièrs, vila de l’Argeria francesa?

Un còp de mai, lo cònsol de Besièrs, Robert Ménard, elegit demercé l’apièja de l’FN, provòca la polemica per sas posicions publicas dobèrtament reaccionàrias. Ara fa debat un cambiament de nom d’una carrièra besierenca. Coma o a votat lo conselh municipal, la Carrièra del 19 de Març 1962 es ara la Carrièra del Comandant Denoix de Saint Marc, “eròi francés”, çò ditz la placa.
 
Se tracta d’una causida ideologica. Lo 19 de març de 1962 correspond d’efièch als Acòrdis d’Evian entre França e l’FLN qu’acabèron la Guèrra d’Argeria. Lo personatge del comandant Denoix de Saint Marc, el, s’assòcia al contrari als partisans de l’Argeria francesa. Occitan nascut a Bordèu l’11 de febrièr de 1922 e mòrt a La Garda-Ademar, en Tricastin, lo 26 d’agost de 2013, Hélie Denoix de Saint Marc s’illustrèt d’en primièr contra l’Alemanha nazi: s’engatgèt a 19 ans dins la Resisténcia, foguèt detengut a la frontièra espanhòla après una denóncia en 1943, puèi cugèt morir dins lo  terrible camp de concentracion de Langenstein-Zwieberge. Coma militar, combatèt los independentistas pendent la Guèrra d’Indochina, mas son ròtle mai polemic foguèt en Argeria. Amb lo batalhon que comandava, se jonguèt al putsch dels generals de 1961 qu’acceptavan pas la volontat del president francés, De Gaulle, de bailar a Argeria son independéncia. Detengut, puèi condemnat, Hélie Denoix de Saint Marc expliquèt dins son procès que voliá pas que s’abandonèsse los harkis coma s’èra abandonat los supletius vietnamians. De Gaulle lo gracièt en 1966 e lo comandant foguèt reabilitat de sos dreches civils e militars en 1978.
 
Dissabte 14 de març, Robert Ménard, nascut a Oran, aprofechèt lo cambiament de nom de la carrièra per organizar una ceremònia de nostalgia de l’Argeria coloniala. I venguèron de pènegres e de militants d’extrèma drecha, en particular identitària, al mièg dels cants militars. “Argeria es nòstre paradís”, çò diguèt lo cònsol d’extrèma drecha dins son discors que glorificava lo colonialisme francés.
 
En fàcia, s’organizèt una contramanifestacion venguda de l’esquèrra, e i a aguèt fòrça tension entre los dos camps. “Ièr volguèron l’Argeria argeriana; vòlon pas uèi de la França francesa”, çò comentèt Robert Ménard a prepaus dels contramanifestants, en tot acabar son discors. Fins ont anarà l’alienacion occitana?

 
 


Midi Libre: Béziers : Ménard débaptise une rue et ravive la nostalgie de l'Algérie française
 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies