Govèrn Notícies

Carta dubèrta deth sindic d’Aran ara ciutadania aranesa

Planvoluts/des vesins e vesies d’Aran,

M’adreci a vosati/es entà anonciar-vos qu’aué, eth Conselh de Ministres m’a nomentat secretari generau deth Rèpte Demografic, un nomentament que resulte incompatible damb es foncions de sindic, coma establís era Lei d’Aran. Ei per aquerò qu’eth propèr dia 29 d’octobre se celebrarà un plen extraordinari deth Conselh Generau d’Aran, a on presentarè era mia renóncia coma sindic, entà qu’era vicesindica prumèra, Maria vergés, assumisque aguest cargue.

Entà jo ei un aunor e un orgulh auer ostentat eth cargue de sindic, representant a Aran e es sòns interèssi e trebalhant, pendent tota era mia vida, e amassa damb es auti conselhèrs en aguesta darrèra etapa, entà milhorar era vida dera sua gent.

Aguest nomentament ei ua decision que m’aunore e, çò mès important, reconeish eth trebalh de fòrça persones que pendent aguesti ans auem trebalhat peth reconeishement des parçans de montanha e eth mon rurau. Aué, a toti aqueri collectius, associacions, comarques, territòris luenhencs, mos dan era oportunitat de gestionar es politiques vinculades ara coesion territoriau e des que va a depéner eth futur propèr, mès, plan especiaument aguest futur qu’a long tèrme volem entàs nòsti territòris e es nòsti hilhs e hilhes.

È de dider-vos qu’è ua sensacion agredoça, pr’amor que des deth Conselh Generau d’Aran escriuem ara era avantguarda d’aqueres naues dinamiques qu’an de mercar eth futur d’Aran, e aguest a estat, e ei, un procès apassionant. Totun, aguest procès non acabe en absolut, senon tot ath contrari, va a èster refortilhat.

Pr’amor qu’eth mèn compromís damb Aran non càmbie bric, ne un shinhau. Seguisqui totaument comprometut damb Aran e era sua gent. En tot aguest temps, auem trebalhat de forma intensa entà desvolopar politiques e projèctes qu’impacten positivament ena vida des aranesi e araneses, damb resultats plan notables que poderam milhorar en aguest nau temps.

Tanplan qu’ei gràcies ara competéncia e capacitat des persones que formen part deth Govèrn deth Conselh Generau qu’aué podem dar aguest pas. Un pas que vau a hèr personaument, mès que respon a ua decision fòrça meditada e compartida damb toti es conselhèrs deth Govèrn aranés, ena quau auem avalorat eth sòn significat coma reconeishement entà Aran e es oportunitats de futur que se daurissen entath nòste territòri. A mès, ei era prumèra ocasion ena etapa democratica, qu’un conciutadan dera nòsta Val formarà part der epicentre de decisions politiques plan importantes entàs propèrs ans.

Es nòsti projèctes de legislatura en Conselh Generau d’Aran son ben encaminadi e voi nomentar-ne quauqu’uns:

  • Era candidatura dera Resèrva dera Biosfèra, que se presentarà a finaus d’an
  • Eth projècte de sostenibilitat toristica, ja dotat damb 2,5m€
  • Era estratègia de gestion e resiliéncia forestau, ja en fasa de redaccion de convèni
  • Eth desvolopament d’ua dinamica relacionada damb era innovacion, que despegue aguesti dies damb era dubertura dera incubadora e era contractacion de professionaus entath supòrt a naui projèctes d’em- prenedors, damb era volentat de retier eth talent deth nòste territòri.
  • Sense desbrembar er important trabalh que vien realizant des der encastre sanitari, en moments plan complicadi, a despiet des quaus, auem renauit practicament tota era maquinària espitalària e refortilhat es plantilhes medicaus entà dar responsa ara crisi que viuem…

Non pogui estiener-me tot çò que desiraria entà méter en valor er enòrme trabalh des professionaus que, en diferenti airaus, gestionen es servicis publics d’Aran, mès voi manifestar-les tot eth mèn reconeishement e era mia gratitud peth sòn esfòrç e tenacitat en milhorar dia a dia era vida des aranesi e araneses. Tanpòc me desbrembi des responsables politics, damb es que mès enlà des diferéncies, collaboram estretament, e as que les arregraïsqui era volentat e eth ton constructiu pendent aguesti ans.

Ara, se daurís, daurim, ua naua etapa que va a refortilhar tota era gestion hèta enquiath moment, e ac hèm damb eth madeish esperit d’equip e compromís qu’auem mantengut enquia ara. Aran ei e a estat un modèl en fòrça sentits, ua Val damb ua gent emprenedora qu’a sabut convertir es dificultats en oportunitats. Aguest a de seguir estant er esperit que mos motive. Seguir assumint rèptes, damb pas fèrm e sense pòsa.

Voi insistir en que seguirè e seguiram, ath servici d’aguest petit gran país que tant estimam e peth que, tostemp, è dat çò milhor de jo entà contribuïr ath benestar des sòns vesins. Eth mèn compromís ei, e serà tostemp, Aran.

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies