Notícies

Catalonha celèbra uèi sa fèsta nacionala dins un encastre de repression politica

Catalonha festeja uèi sa Diada nacionala amb sos representants legitims en preson o en exili, e a l’espera d’un senténcia judiciària contra los presonièrs politics e d’autres elegits acusats. La Diada a luòc uèi dos ans après que se votèt majoritàriament per l’independéncia dins un referendum reprimit amb violéncia per la polícia espanhòla e dins un encastre d’incertitud après una republica proclamada e non aplicada, jos una repression estatala e amb un govèrn en Espanha qu’es en foncions e que, per ara, contunha las meteissas politicas repressivas que lo govèrn precedent.
 
L’11 de setembre, los catalans se remembran la casuda de Barcelona en 1714 davant las tropas borbonosas. Lo País Valencian èra tombat en 1707 e Malhòrca anava èsser vencuda en 1716. Aquela desfacha representèt la fin de las institucions catalanas e la castelhanizacion del país.
 
Demest los divèrses eveniments, se tendrà a 17h14 una manifestacion multitudinària. Compte tengut dels eveniments de las darrièras annadas, se prevei que mai d’un milion de personas tornen prene las carrièras de Barcelona per exigir l’independéncia, la republica e la democracia. Ongan, l’Assemblada Nacionala Catalana (ANC) compta sul sosten d’autras associacions coma Òmnium Cultural e l’Associacion dels Elegits per l’Independéncia. Lo lèma d’ongan es “Objectiu independéncia”, amb lo qual los organizaires demandan als politicians que sián capables de se metre d’acòrdi fàcia a la tòca comuna de l’independéncia, quina que siá l’ideologia de cadun. En aquesta ocasion, la manifestacion tendrà per ponch central la Plaça d’Espanha de Barcelona. “Avèm cercat una plaça bèla ont confluiscan de grandas carrièras, perque volèm representar qu’a partir de camins desparièrs i a un ponch de confluéncia qu’es l’independéncia”, çò diguèt la presidenta de l’ANC, Elisenda Paluzie, quand presentèt l’eveniment als mèdias. Per tant, es previst que las cinc carrièras que s'acaban sus aquela plaça sián plenas de manifestants. Amb aquel imatge vòlon dessenhar l’union devèrs una tòca centrala.
 
Coma d’abitud, la manifestacion comença a 17h14, en memòria de l’an 1714 quand Barcelona tombèt jos l’armada francocastelhana e Catalonha perdèt son independéncia. L’ANC recomanda d’èsser aquí una ora abans. En mai d’aquò, s’organizarà una fièra de consum estrategic de produches, espleches e servicis del país.

 

 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies