Notícies

Catalonha: de joves esportius d’elèit son ara los pòrtadrapels de l’occitan

De joves esportius d’elèit catalans son ara los pòrtadrapèls de l’occitan en Catalonha.  Los medalhats M17 Rogelio Caballero, Mario Clemente, Adrià López, Iu Pereira e Pau Soler, de l’Escòla Ongresa d’Escrima de Badalona, recebèron un exemplar del libre E d’aicí nasquèron los mites de Griselda Lozano de las mans de Margarida Sala i Albareda, directritz del Musèu e delegada institucionala de la Generalitat de Catalonha. La ceremònia se debanèt après la presentacion del  libre dijòus passat, 15 de junh, al Musèu d’Istòria de Catalonha.
 
Aqueles esportius recebèron lo libre en reconeissença a la trajectòria esportiva de 2017. Eles fan partida de las nòvas generacions del programa de Naut Rendement Esportiu del Conselh Catalan de l’Espòrt, e son jos la tutèla del Conselh Catalan de l'Espòrt e per la Federacion Catalana d’Escrima. En mai d’aquò recebèron d’autres presents e las felicitacions de Joan Cardona, secretari del CAÒC; de Xavier Moral, responsable de la promocion de l’occitan a la Generalitat de Catalonha; de Ferriòl Macip, cap-redactor de Jornalet e de la quita escrivana, Griselda Lozano.
 
Aquela iniciativa seguís la tòca de la Fondacion Ager, per la sensibilizacion envèrs la lenga occitana en Catalonha en tot promòure lo binòmi “cultura e espòrt”.
 
 
Lo libre
 
Lo libre E d’aquí nasquèron los mites es una seleccion dels melhors articles de Lozano sus l’istòria d’Occitània publicats sus Jornalet.
 
Amb un estil pròpri, entre lo scientific e lo literari, Griselda Lozano nos ofrís amb sos racontes una reflexion interessanta sus qual sèm e d’ont venèm. Nòstra sciéncia, nòstra cultura e nòstre biais de comprene lo Mond començan de se definir a l'Edat Mejana, mai que mai en Occitània. En aquel moment, Euròpa viu una revolucion sociala e culturala que sens ela la Renaissença seriá pas estada possibla. S’agís d'un trabalh istoric e literari impecable qu'a atench los nivèls pus nauts de lecturas dins Jornalet.

 
 



 

Leave a Reply

Your email address will not be published. Required fields are marked *