Notícies

Catalonha: d’iniciativas solidàrias amb los caumaires de la fam

Un grop de dotze ensenhaires de segondari del Licèu Baix Penedès de El Vendrell (Catalonha) an entamenat una iniciativa de solidaritat amb los presonièrs politics catalans que fan la cauma de la fam. “Cada jorn, un professor o una professora quita de manjar per vint e quatre oras, mas cèssa pas de trabalhar. L’endeman, es un collèga que pren sa plaça. E atal, tant que la cauma durarà”, çò a explicat l’ensenhaire occitanofòn Jaume Figueras a Jornalet.
 
En mai d’aquò, Figueras assegura que n’an assabentat los mèdias e d’autres licèus “e pel moment plan de mond i son interessats”.
 
Lo Licèu Baix Penedès de El Vendrell fa dempuèi dètz e sèt annadas d’escambis amb los escolans d’occitan del Licèu Las Casas de la Vaur (Lauragués).
 
 
De junes solidaris en sosten als caumaires
 
D’autras iniciativas en sosten als caumaires se son a debanar per Catalonha tota, dont la majoritat son coordenadas per la plataforma Pro d’Ostatges. De soslinhar un june collectiu que començarà dimenge venent e que finirà lo 26 de decembre dins l’abadiá de Montserrat. Aquí los caumaires seràn acompanhats dels parents dels presonièrs politics. D’autres junes collectius de solidaritat amb los caumaires son programats a Cornellà de Llobregat entre lo 14 e lo 21 de decembre, e un autre deu començar deman a Barcelona.
 
En mai de tot aquò, de deputats del Parlament de Catalonha an anonciat que faràn un june de 24 oras uèi, jorn qu’Espanha festeja sa Constitucion.
 
 
Sosten de quaranta eurodeputats
 
Una quarantena d’eurodeputats d’una quinzena d’estats membres e de quatre grops parlamentaris europèus an exprimit lor solidaritat amb los quatre presonièrs politics en cauma de la fam. Los eurodeputats, dont l’occitan José Bové, fan una crida per metre fin a “aquela anomalia dins l’Union Europèa, ont nòu presonièrs politics e cinc exiliats, que son considerats coma de ciutadans liures dins totes los estats de l’UE, o son pas en Espanha”. Per tant, reclaman que los presonièrs politics catalans sián liberats.
 
A mai, los eurodeputats fan una crida a las institucions de l’UE per que velhen pel compliment dels tractats de l’UE e pels dreches fondamentals de sos ciutadans e, doncas, que fagan “un gèst de responsabilitat en favor del dialòg per trobar una solucion politica al problèma catalan”.
 
 
 



 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies