Notícies

Catalonha: manifestacion massissa per la libertat dels presonièrs politics

De centenats de milièrs de personas (750 000 segon la polícia locala) manifestèron ièr a Barcelona contra la politica de repression de l’estat espanhòl. Jol lèma “Libertat presonièrs politics. Sèm republica”, los manifestants illuminèron amb lors telefòns mobils los 3,3 quilomètres de percors, en creant ansin un imatge espectaclós.
 
Los manifestants, que portavan de ribans jaunes en simbòl de solidaritat amb los presonièrs, cridèron per lor libertat mas tanben “Puigdemont nòstre president”. Dins lo cortègi se podiá veire de bandeiròlas que revendicavan “Pro d’umiliacions, pro de messorgas”, “Exigissèm respècte e dignitat”, “Ensems apararem mai que jamai nòstre govèrn legitim” e quitament “SOS Democracy”.
 
Sus l’empont installat la fin de la marcha, de parents o amics dels presonièrs legiguèron lors messatges, escriches en preson, del temps que se projèctet los messatges vidèo que los mandèron lo president Puigdemont e sos ministres exiliats a Brussèlas.
 
La justícia espanhòla perseguís d’un biais autoritari los elegits e los foncionaris independentistas e encarcèra dempuèi mai d’una setmana la mitat dels conselhièrs del govèrn de la Generalitat e dempuèi gaireben un mes los presidents de las doas associacions independentistas.
 
 
Lo govèrn en exili o en preson
 
Lo 5 de novembre passat, la justícia bèlga daissèt en libertat lo president legitim de Catalonha, Carles Puigdemont, e los quatre conselhièrs de son govèrn que l’acompanhan a Brussèlas. Se tracta de Toni Comín, Meritxell Serret, Clara Ponsatí e Lluís Puig. Los ministres en exili s’èran presentats volontàriament davant las autoritats d’aquel país après que la justícia espanhòla aguèt emés un mandat d’arrèst internacional.
 
A l’ora d’ara, la lista de presonièrs politics compren lo vicepresident Oriol Junqueras e los conselhièrs Raül Romeva, Jordi Turull, Dolors Bassa, Carles Mundó e Meritxell Borràs. Son acusats de presumits delictes de sedicion, rebellion e malversacion de fonzes publics. Los embarrèron lo 2 de novembre passat dins mai d’una preson a l’entorn de Madrid.
 
Lo Parlament e las associacions independentistas
 
Quants als membres independentistas del burèu del Parlament de Catalonha, la presidenta Carme Forcadell foguèt empresonada dijòus passat, mas poguèt sortir l’endeman en pagant una caucion de 150 000 èuros gràcias a la caissa de solidaritat de l’Assemblada Nacionala Catalana (ANC). D’autres quatre membres del burèu del Parlament —solament los de pensada independentista— son en libertat jos una caucion de 25 000 èuros.
 
Lo 16 d’octòbre passat, èran estats mandats en preson ferma los presidents de las doas associacions independentistas, Jordi Cuixart, president d’Òmnium Cultural, e Jordi Sànchez, president de l’ANC.
 
Totes son acusats de rebellion e sedicion e riscan de penas de 30 ans de preson.

 
 
 

 

 



 



 

Leave a Reply

Your email address will not be published. Required fields are marked *