Notícies

Catalonha Nòrd festejarà deman sa resisténcia al Tractat dels Pirenèus

Catalonha Nòrd commemorarà deman sos 360 ans de resisténcia al Tractat dels Pirenèus, qu’incorporèt aquel país catalan dins lo Reialme de França. L’eveniment principal serà una manifestacion que se tendrà jol lèma “Sèm Païses Catalans” que percorrerà tre 16h las carrièras del centre vila de Perpinhan, de la Plaça de Catalonha fins al Castelhet, ont se farà un acte politic. La jornada se clavarà amb una tièra de concèrts a partir de 20h a l’Ostal de la Musica.
 
Arunan, la marcha aguèt un succès estrambordant amb la participacion de mai de 10 000 personas e venguèt una crida per la libertat dels presonièrs politics catalans. Ongan, serà marcada per la publicacion de la senténcia contra los presonièrs politics, la revòlta populara e la repression que se tenon en Catalonha Sud aquestes darrièrs jorns.
 
En mai d’aquò, al Pertús es convocat, d’11h a 13h, un aperitiu e un picnic per l’independéncia e l’afrairament entre los catalans del sud e del nòrd.
 
Lo Jorn de Catalonha Nòrd se commemòra lo 7 de novembre, mas la manifestacion se desplaça de qualques jorns dins una dimenjada car dins l’estat francés la data es pas un jorn feriat. Se remembra lo Tractat dels Pirenèus, signat per las monarquias francesa e espanhòla en 1659, que simboliza la particion de Catalonha, la pèrda de las institucions pròprias en Catalonha Nòrd, lo començament de la descatalanizacion sistematica del país e la resisténcia de l’identitat catalana als divèrses regims franceses.
 


 



 

 


 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies