Notícies

Copa del Mond del XIII: la granda fèsta del rugbi de movement

Uèit formacions pòdon encara somiar de soslevar lo trofèu de campions del Mond, mas nòstres Pols an pres l’avion del retorn al país…
 
 
Quand Tònga pluma lo Kiwi…
 
Una partida plan dobèrta se joguèt aqueste dissabte de matin a Hamilton entre Tònga e la Nòva Zelanda. A la pausa, amb un ensag sus la darrièra accion, los Negres tornèron al vestiari amb un brave avantatge de 16-2. Aquò demoralizèt pas la formacion tongana que foguèt mèstra de la pelena long del segond temps a ne faire pèrdre lo babaròt als locals: los Roges metèron a profièit las aproximacions dels Negres e marquèron sus un còp de pè a seguir, sus intercepcion… per finalament s’impausar 28-22. Los tongans, fòrts d’aquesta primièra victòria dins los rescontres entre las doas seleccions, acaban atal primièrs de la pola B e pòdon somiar a un destin bèl.
 
Dins aqueste grop, la tresena plaça qualificativa se joguèt a Cairns entre Escòcia (que deviá ganhar) e Samoa (que deviá pas pèrdre). Dins las darrièras cinc minutas, lo dobertura europèu manquèt una penalitat e dos tombats. A la còrna, lo planchòt indicava 14-14. Una egalitat que qualifica Samoa per rescontrar Austràlia en quarts.
 
 
Quequerequet, pas pus gròs que mon punhet
 
Dins la pola A, dissabte, Austràlia dominèt logicament Liban: 34-0. Dimenge, los angleses dintrèron determinats sus la pelena de Perth: al cap de 8 minutas, avián marcat tres ensages e menavan 18-0 fàcia als Pols que redoblèron de valentisa per evitar una catastròfa. Benjamin Garcia capitèt a marcar un ensag que Lucàs Albèrt transformèt: 26-6 a la pausa e 36-6 a la fin pels angleses. E un brave talhièr per la Federacion per bastir una esquipa competitiva d’aicí a l’edicion de 2021 de la Copa del Mond.
 
 
Papós e fijians fan bona impression
 
Los Fidjians sortisson del primièr torn amb tres victòrias: la darrièra contra los italians 38-10. Passejada de santat e tresena victòria tanben pels papós fàcia als Tomahawks americans qu’èran pas plan agusats: 64-0, amb 11 ensages a la clau.
 
Irlanda termina sus una bona nòta amb una victòria sus Galas 34-6.
 
 
Los quarts
 
Aquesta fin de setmana, los quarts de finala opausaràn Austràlia a Samoa, Anglatèrra a Papoa, la Nòva Zelanda a Fidji e Tònga al Liban.
 
 
Temps de represa
 
Gaire de mond a la represa de l’entraïnament dels Dragons Catalans: solament 7 jogaires! Cal dire que, jos mai d’una color, un quinzenat de portaires del malhòt sang e aur son a jogar la Copa del Mond.
 
En Elèit 1, las dètz esquipas se traparàn aqueste dimenge 19 de novembre a Avinhon per un torneg de rugbi de 9, una mesa en condicions per la represa del campionat la primièra dimenjada de decembre.
 
 
 
 
Alan Roch
 
 
 




 

Leave a Reply

Your email address will not be published. Required fields are marked *