Notícies

De matematicas en occitan

Joan-Glaudi Babois, president de Provença Tèrra d’Òc – IEO 83, lo coneissèm coma poèta e esculptor. Mas pròva un interès màger per li matematicas. Sobretot, a lo gaubi per presentar li matematicas d’un biais originau e interessant, sigue per evocar l’istòria de la descubèrta d’un teorèma ò d’una proprietat, sigue per presentar de torns que semblan aquelu dei mentalistas (a partir d’un d’aquelu torns si faguèt la Dictada Occitana de Carnolas en lo 2019).
 
Cau finda saupre que, coma ancian professor de matematicas, contunha de faire de recèrcas dins aqueu camp. De recèrcas per trobar de cauas nòvi. E n’en tròba! Au ponch d’interessar de gents dau Monde entier.
 
La sieu darriera tròba, embai felicitacions de Jean-Paul Delahaye, informatician e matematician francés à Lilla e au CNRS, pertòca una proprietat dei nombres promiers, que n’a fach un article publicat dins la revista numerica Sapiéncia, dont si pòdon lièger d’autres articles de la sieu pluma. La seguida mesa en evidéncia es estada notada en America sobre l’o-e-i-s[1] ref-A331764 dont Joan-Glaudi Babois a ja de contribucions.
 
A la nòstra conoissença, es lo promier a publicar en occitan una formula importanta dins lo camp dei nombres promiers. Un eveniment que sembla gaire important per qu non s’interèssa ai matematicas, mai que mòstra polidament que la lenga nòstra es au nivèu dei autri. E que i a pas besonh de publicar en anglés per èstre reconoissut!
 
 
 
 
Reinat Toscano
 
 
 
    [1] Enciclopèdia de seguidas numericas entieras creada per Neil Sloane e Simon Plouffe.





 
 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies