Notícies

De perseguits per la justícia espanhòla son candidats a las eleccions

Se sarra un periòde electoral mai que mai important dins l’estat espanhòl. Lo 28 d’abril, i aurà d’eleccions legislativas, del temps que lo 26 de mai se faràn las eleccions al Parlament europèu, a las municipalitats, a divèrsas regions e al Conselh General d’Aran. Dins aqueste encastre se presentan coma candidats qualques represalhats de la justícia espanhòla amb la tòca de metre sus l’escaquièr la separacion dels poders dins l’estat. La maire d’un dels joves d’Altsasu e Oriol Junqueras son, per exemple, de candidats al Congrès dels Deputats. De son caire, Carles Puigdemont se presenta a l’eurocambra e, en cas que venguèsse deputat europèu, tornariá en Catalonha, car auriá l’immunitat parlamentària.
 
Bel Pozueta es la maire d’Adur Ramírez de Alda, condemnat a dotze ans de preson per una bagarra de bar en Altsasu (Bascoat). Amb sa candidatura a las eleccions espanhòlas per EH-Bildu en Navarra, vòl refortir la denóncia de las irregularitats del procès que manten sèt gojats e una gojata del Bascoat encarcerats, condemnats per atemptat a l’autoritat e trebol de l’òrdre public en seguida d’una bagarra nocturna de bar que i participèron dos policièrs de la Gàrdia Civila sens unifòrme.
 
EH-Bildu es a negociar un acòrdi amb ÈRC fàcia a las eleccions espanhòlas. Per ara es pas qu’una aliança estrategica que se concretizarà dins los jorns avenidors.
 
Mentretant, lo president d’ÈRC, Oriol Junqueras, presonièr politic que son jutjament se ten actualament a Madrid, se presenta a l’eleccion del 28 d’abril amb la tòca de “denonciar la repression”. Amb la meteissa tòca se presentarà Junqueras a las eleccions europèas.
 
De son caire, Puigdemont diguèt dins una entrevista a la ràdio RAC1 qu’en cas que venguèsse eurodeputat tornariá en Catalonha car “l’immunitat s’activa tre qu’òm es elegit, a partir del moment que lo govèrn espanhòl comunica lo resultat de las eleccions”, çò precisèt.
 
Tanben parlèt de las dificultats que l’estat espanhòl pòsca crear quand deuriá anar quèrre son certificat de deputat. La lei espanhòla requerís que lo candidat lo prenga “en tot jurar o prometre obesissença a la Constitucion [espanhòla]davant lo Conselh Electoral” espanhòl dins un relambi de cinc jorns après la proclamacion del resultat. “Lo Parlament Europèu obliga sonque los estats membres de comunicar quines deputats son estats elegits, e se la nòrma ditz que cal prene lo certificat davant lo Conselh Electoral, aquò vòl pas dire personalament”.
 
Puigdemont se revendica “ciutadan liure de l’Union Europèa” en tot remembrar que sèrva totes sos dreches politics. “S’un estat membre enebís a un ciutadan d’èsser candidat, viòla totas las règlas de la democracia”, çò recòrda.

 
 
 



 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies