Un ensenhaire francés foguèt decapitat divendres a Conflans-Sainte-Honorine, a una trentena de quilomètres al nòrd-oèst de París. L’agressor presumit, un gojat de dètz e uèch ans d’origina chechèna, la polícia lo tuèt per bala dins la vila vesina d’Eragny, çò rapòrta Le Monde.Se passèt a la sortida del collègi del Bois d’Aulne ont la victima èra professor d’istòria-geografia. Segon qualques mèdias, l’ensenhaire auriá fach un cors sus la libertat d’expression e auriá mostrat als escolans de caricaturas de Maomet. Segon aqueles mèdias, aquò auriá motivat l’accion de l’assassin. Per aquela rason, lo parquet antiterrorista a dobèrt una enquista per “assassinat en relacion amb una entrepresa terrorista” e “associacion de malfactors terrorista criminala”.
Lo president de França, Emmanuel Macron, e lo primièr ministre, Jean Castex, se gandiguèron sus plaça, e lo ministre de l’Interior, Gérald Darmanin, los jonguèt dins una cellula de crisi. Darmanin èra en Marròc mas a avançat son retorn a París.
Lo crime se passa un mes après que comencèt lo jutjament de l’atemptat terrorista contre Charlie-Hebdo e lo supermercat cashèr. A aquela ocasion, la revista satirica tornèt publicar las polemicas caricaturas del profèta de l’islam e Al Qaida a tornarmai menaçat de mòrt los gasetaires. A la fin de setembre, un òme ataquèt amb un cotèl dos emplegats d’una agéncia d’informacions que se tròba dins la bastissa ont i aviá l’ancian sèti parisenc de Charlie-Hebdo.
Un enseignant d'histoire a été décapité en fin d’après-midi vendredi à Conflans Saint-Honorine (Yvelines). Son agresseur présumé a été tué par la police. https://t.co/rt4qvQFgPb
— Libération (@libe) October 16, 2020