D’independentistas del Mond entièr se son rescontrats en Corsega – aranes.org
Notícies

D’independentistas del Mond entièr se son rescontrats en Corsega

Las Jornadas Internacionalas de Corti, qu'organiza cada estiu Corsica Libera, an agut ongan una larga representacion de tot lo Mond, çò rapòrta VilaWeb. L'eveniment comencèt dissabte amb una conferéncia de premsa de las delegacions internacionalas. De soslinhar la participacion del representant dels afars internacionalas de l'FLNKS de Nòva Caledònia, ont se i tendrà un referendum oficial d'autodeterminacion lo 4 de novembre que ven. Las jornadas an aculhit tanplan una vasta representacion catalana.
 
 
La violéncia dels estats contra los pòbles en lucha
 
Lo primièr debat se centrèt sus "la violéncia de l’estat contra los pòbles en lucha". Aquí se tenguèt una intervencion interessanta de Conxita Bosch de l’Associacion Catalonha Corsega e de Cesc Poch d’Esquèrra Republicana de Catalonha, que faguèron una detalhada exposicion de la repression de l’estat espanhòl contra l’independentisme catalan, de la brutala repression policièra del referendum del 1r d'octòbre passat, de l’encarcerament dels representants de la societat civila, de las perquisicions e menaças contra la premsa, las estampariás, los cantadors, los professors, e fin finala de la situacion d’après lo 27 d'octòbre amb la declaracion d'independéncia e l’aplicacion de l'article 155, ont se suspenguèt l’autonomia e s’empresonèt los membres del govèrn de la Generalitat qu’èran demorats en Catalonha. Se denoncièt tanben la persecucion per mejan dels mandats d'arrèst europèus dirigits contra los elegits catalans en exili mas refusats pels autres païses.
 
Dins aquel parladís intervenguèt tanben Iker Elizalde per l’esquèrra basquista, que critiquèt l’immobilisme de l’estat espanhòl a respècte de la situacion dels presonièrs bascos, e denoncièt la dispersion coma venjança politica de l’estat contra las familhas dels presonièrs e l’independentisme basco.
 
De son costat, Katy Bartoli, per l’organisme de solidaritat amb los presonièrs còrses Sulidarità, condemnèt la politica repressiva de l’estat francés envèrs los independentistas empresonats, malgrat lo procès de desmilitarizacion de l'FLNC de l'an 2012 e l’exigéncia d’amnestia de part del govèrn de Corsega, de las comunas e de la majoritat del pòble còrs. Faguèt una crida a la participacion a la manifestacion nacionala per la revendicion de l’amnestia del 22 de setembre venent.
 
 
 
De l'autonomia a l'independéncia
 
Dimenge, lo primièr debat internacional foguèt organizat per U Ribombu sul tèma  "Dels limits de l’autonomia al futur de l'independéncia". A aquel debat participèt lo canac Mickaël Forest , responsable dels afars internacionals de l'FLNKS, que dins son intervencion expliquèt los enjòcs generals de la campanha dels independentistas canacs per l'òc a l'independéncia , de las fraudas del recensament e de la discriminacion raciala de l’estat francés denonciat dins cinc rapòrts de la mission de l’ÒNU per la Nòva Caledònia.
 
Per quant a el, Moetai Brotherson, deputat independentista de la Polinesia francesa, parlèt tanben del procès de descolonizacion e dels ensages nuclears franceses dins son país.
 
Per Catalonha intervenguèt Josep-Lluís Carod Rovira, èx-vicepresident de la Generalitat, pel País Basco parlèt Gorka Elejabarrieta, e Petru Antoine Tomasi, cap del grop parlamentari Corsica Libera membre de la coalicion nacionalista Pè a Corsica, expliquèt la posicion de Corsica Libera davant lo refús francés d’autrejar la mendre avançada dins l'encastre constitucional.
 
Long del debat entre las fòrças nacionalistas que govèrnan Corsega dins la coalicion Pè a Corsica i participèron de conselhièrs territorials, de representants sindicals e de conselhièrs executius (membres del govèrn còrs) a prepaus de l'agricultura, de l'environament e dels transpòrts.
 
 
Refondar l'Union Euròpa
 
La clavadura de las Jornadas Internacionalas de Corti se faguèt amb un miting de Corsica Libera que i participèt per videoconferéncia lo president de la Generalitat de Catalonha en exili, Carles Puigdemont, per mercejar Corsega de son sosten. Dins un discors en francés, Puigdemont defendèt qu'Euròpa se deu refondar sus la basa del respècte de la democracia e de la diversitat de las nacions dobèrtas a la rèsta del Mond.
 
Puèi, Josep-Lluís Carod Rovira intervenguèt en lenga còrsa amb una reflexion sus Euròpa: "Los estats an sequestrat Euròpa e l’an transformada en una estructura freja e sens arma. Los pòbles coma lo catalan e lo còrs devèm recuperar Euròpa per la democracia e la libertat".
 
Lo seguiguèt Arnaldo Otegi, coordinator general d’EH-Bildu, que dins son intervencion prepausèt de bastir “de procèsses democratics de resolucion dels conflictes tant en Corsega coma al Bascoat”; defendèt pereu lo "besonh de bastir [lors] pròprias republicas independentas dins l'encastre europèu".
 
Las intervencions las clavèt lo president de l’Assemblada de Corsega, Jean Guy Talamoni, qu'anoncièt que "davant la nòva estapa que se dobrirà en setembre, es essencial que [lor] majoritat prenga lo temps necessari per debatre e definir una nòva estrategia, comuna e eficaça" contra lo govèrn francés. "Quin que siá lo destin de la revision constitucionala francesa al començament de la rintrada, e quina que siá l'eventuala plaça de Corsega dins aquel tèxt, es fòrça clar que jamai lo [reconeisseràn] coma [lor] lei fondamentala", çò afirmèt, en assegurant que "l'independéncia es l’unica esperança".
 
Enfin, Talamoni acabèt son intervencion en demandant la bastison d’una "estrategia comuna en Euròpa" amb d'elegits bascos e catalans per una "nòva Union Europèa".

 





 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies