Notícies

Divendres que ven, <em>Jornalet</em> festejarà a Marselha son cinquen anniversari

L’Ostau dau País Marselhés aculhirà divendres que ven la segonda “assemblada dels legeires de Jornalet” d’ongan dins l’encastre de la celebracion dels cinc ans d’aqueste mèdia, que nasquèt lo 31 de març de 2012.
 
Se tracta d’una reünion dobèrta ont lo capredactor d’aqueste jornal en linha explicarà son trabalh de cada jorn, lo foncionament del mèdia, e escotarà totas las opinions dels legeires que participen a l’assemblada. La tòca es de metre en comun d’idèas e d’avises e de marcar la linha de seguir. A la fin, se farà lo veirat de l’amistat en musica. Durant l’eveniment se presentarà l’espòt fach a prepaus d’aqueste cinquen anniversari.
 
Ongan, la còla de Jornalet vòl ben festejar son cinquen anniversari. Per ansin, avèm previstas divèrsas assembladas de legeires de Jornalet a travèrs d'Occitània tota per tal de nos rescontrar, conversar, nos conéisser personalament, amassar d’idèas, de suggestions, de proposicions de melhorament e tot çò que caldrà per far en sòrta que Jornalet siá un jornal de totes e per totes.
 
Sèm conscients que lo prètzfach es grand e que las ressorsas son escarsas, mas esperam de rompre los clichats e los complèxes amb l’ajuda de totes. Sèm pas perfièches e es plan segur que fasèm d’errors. Esperam alavetz que nos ajudaretz a nos melhorar amb vòstres comentaris, criticas e contribucions. Fasètz-vos vòstre lo Jornalet perque lo Jornalet es de totes.
 
 
E puèi Barcelona e Narbona
 
La primièra assemblada de legeires de Jornalet d’ongan se tenguèt a Carcassona l’8 de febrièr passat, e après Marselha, seguiràn de reünions e presentacions a Barcelona lo 27 d’abril e Narbona lo 18 de mai. Es tanplan prevista una fèsta occitana amb de concèrts per festejar l’anniversari de Jornalet a Barcelona lo 1r de julhet.
 
 
Convidatz-nos a venir en çò vòstre
 
En mai d’aquò, voldriam èsser presents per Occitània tota, de Medoc a Ròia e d’Aran a Borbonés. Fasèm doncas una crida a totes los que vòlgan organizar una assemblada de legeires de Jornalet. Solament cal organizar un rescontre, e s’es possible amb una velhada, e nos ofrir un lièch per dormir una nuèch. Escrivètz a info(a)jornalet.com e nos metrem d’acòrdi  pel luòc e la data.
 
  Anniversari de Jornalet
Divendres 24 de març 18h30
Ostau dau País Marselhés
18 Carriera de l'Olivier, 13005 Marselha
 
 
  Editorial del 1r de genièr: 2017: tota una annada per festejar lo cinquen anniversari de Jornalet.
 
 



 

Leave a Reply

Your email address will not be published. Required fields are marked *