Notícies

Eleccions municipalas: abstencion istorica, espelida dels ecologistas e revirada de Macron

Lo segond torn de las eleccions municipalas es marcat per una nauta abstencion e la victòria de l'esquèrra a Marselha, e dels ecologistas a Bordèu e dins d’autras vilas importantas de l’estat francés coma Lion o Estrasborg. D’autre caire, lo partit del president Emmanuel Macron a patit una granda revirada, e mai lo primièr ministre Édouard Philippe aja ganhat dins sa vila, la normanda Le Havre.
 
Segon los primièrs resultats, a Marselha l’ecologista Michèle Rubirola, que mena una lista d'esquèrra, serà elegida consolessa màger, e a Bordèu, lo tanben ecologista Hurmic despassa de pauc Florian de la coalicion dels Republicans e de La Republica en Marcha (LR-LREM). Dins aquela vila cal tanben soslinhar que la lista d'esquèrra radicala conducha per l'èx-candidat a la presidenciala Philippe Poutou aurà tres elegits.
 
A Tolosa, totun, lo cònsol màger Jean-Luc Moudenc (LR-LREM) venceriá per tres o quatre ponches percentuals la lista esquerrista d’Antoine Maurice. Aquela coalicion drechista auriá tanben ganhat las comunas de Lemòtges, Nimes e Tolon. A Niça, Christian Estrosi (Los Republicans) a revendicat sa victòria fàcia a la lista ecologista e al Recampament Nacional. A Pau, lo president del Modèm, François Bayrou, es estat reelegit. A Montpelhièr, lo socialista Delafosse auriá ganhat amplament e parièr se passa a Clarmont Ferrand amb la victòria d’Olivier Bianchi.
 

L'extrèma drecha empòrta Perpinhan
 
Lo deputat RN Louis Aliot, opausat en duèl a Perpinhan al cònsol sortent Jean-Marc Pujol, se felicitava aqueste ser passat als mèdias d’aver ganhat dins la capitala catalana.
 
Perpinhan es la primièra vila de l’estat francés de mai de cent mila abitants ont lo partit lepenista obten una victòria dempuèi l'eleccion de Jean-Marie Le Chevallier en 1995 a Tolon. Aqueste còp, lo movement d'extrèma drecha ganha amb l'èx-companh de Marine Le Pen e èx-numèro dos del partit.

 
Recòrd istoric d’abstencion
 
Un dels enjòcs principals d’aquestas eleccions municipalas èra la participacion. La crisi sanitària del coronavirus e la pèrda de credibilitat del sistèma politic son benlèu los factors d’una abstencion recòrd. Del temps qu’al primièr torn, lo 15 de març passat i aguèt una abstencion excepcionalament nauta amb una participacion d'un 44%, aqueste còp la participacion a davalat fins a un 40%. Los cincs departaments de l’estat francés qu'an votat mai son lo de la Corsega del Sud e quatre occitans: Cantal, Losera, los Nauts Alps e las Landas.
 
Podètz consultar totes los resultats sus elections.interieur.gouv.fr.





 
 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies