Bargalló educacion ensenhament ensenyament Notícies Slider

Era Val d’Aran esdevierà ua zòna educativa especiau, atau coma establís era Lei d’Aran

  • Pendent era visita deth conselhèr d’Educacion ath Conselh Generau d’Aran, a on a estat recebut peth sindic d’Aran e era conselhèra de Coneishement, s’a acordat qu’era Val d’Aran esdevengue ua zòna educativa especiau entà facilitar resòler es problematiques especifiques deth territòri, coma era designacion de professorat, era optimizacion des servicis de minjador e transpòrt o era especifictat dera Escòla Aranesa

Eth sindic d’Aran, Francés Boya, e era conselhèra de Coneishement, Angelina Cases, an recebut aué ena sedença deth Conselh Generau d’Aran ath conselhèr d’Educacion dera Generalitat de Catalunya, Josep Bargalló, ara delegada deth Govèrn dera Generalitat en Naut Pirenèu e Aran, Rosa Amorós, e eth director des Servicis Territoriaus d’Educacion en Lhèida, Carles Vega.

Entre es punts mès destacables d’aguesta amassada se trape er acòrd peth quau era Val d’Aran esdevierà ua zòna educativa especiau, atau coma establís er article 55 dera Lei d’Aran. Un projècte que facilitarà resòler es problematiques especifiques deth territòri, coma era designacion de  professorat, era optimizacion des servicis de minjador e transpòrt o era especifictat dera Escòla Aranesa.

Ensenhament non ei ua competéncia deth Conselh Generau d’Aran mès eth sindic d’Aran a afirmat que “mos sentim completament corresponsables pr’amor que quan parlam der ambit dera educacion parlam des projèctes vitaus des nòsti joeni e, per tant, de quina serà era sua projeccion des deth punt de vista professionau e personau e entath govèrn deth Conselh Generau d’Aran ei un ahèr fonamentau”, e a hijut que “çò que pretenem ei qu’es joeni dera Val d’Aran agen oportunitats ena Val d’Aran perque volem auer era capacitat de retier eth talent des nòsti joeni en país”.

En aguest sens, eth conselhèr Bargalló a manifestat que “estam d’acòrd en qu’era realitat dera Val d’Aran ei diferent ara rèsta de Catalunya e que, dera madeisha manèra, era gestion deth sistèma educatiu aranés a d’èster diferent ath dera rèsta deth territòri catalan”. E a hijut que “auem arribat ar acòrd, qu’ara mos manque passar a escrit, peth quau mos cau enténer qu’eth departament d’Educacion de Catalunya e eth Conselh Generau d’Aran son es corresponsables dera educacion ena Val d’Aran e aguesta corresponsabilitat sonque se poirà exercir en tot trabalhar amassa”.

En aguesta amassada s’a parlat, entre auti ahèrs, d’actualizar era Formacion Professionau que s’aufrís en Aran entà adaptar-la as besonhs reaus e actuaus deth territòri. Segontes era conselhèra Cases “eth govèrn deth Conselh vò qu’ETEVA non sigue sonque ua escòla de tecnics esportius, senon tanben qu’ajude en aguest projècte de respóner as besonhs deth país aufrint formacion en auti airaus mès relacionadi damb era nòsta economia coma eth trabalh dera nhèu o era montanha” e a remarcat tanben “era importancia qu’a era Escòla d’Ostalaria de Les, qu’ei un aute pilar dera nòsta economia pr’amor qu’aquiu formam professionaus en restauracion e ostalaria, e que mos cau potenciar fòrça mès”.

Tanben s’a parlat dera situacion des escòles mairaus e deth besonh de trabalhar de forma conjunta entre eth departament d’Ensenyament, eth Conselh Generau e es ajuntaments aranesi entà arténher ligar es escòles mairaus damb es escòles entà auer ua major oferta educativa des 0 as 3 ans.

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies