Notícies Slider

Era Vòlta Ciclista Catalonha apòste pera montanha e visite era Val d’Aran

Vielha, 13 de març de 2018.- Ager auec lòc en Barcelona era presentacion oficiau dera 98au Vòlta Ciclista en Catalonha 2018, en un acte ath qu’assistic eth sindic d’Aran, Carlos Barrera, acompanhat dera conselhèra de Torisme e Desvolopament economic d’Aran, Anna Díaz. Er acte de presentacion siguec presidit peth secretari generau der Espòrt dera Generalitat, Gerard Figueras e peth president dera Vòlta Ciclista en Catalonha, Rubèn Peris.

Dempús de 25 ans d’abséncia era Vòlta Ciclista en Catalonha torne entara Val d’Aran damb eth finau dera 5au etapa en Vielha e Mijaran e era gessuda londeman dera 6au etapa dera carrèra entre Vielha e Torrefarrera.

Eth deluns 19 de març comence en Calella era Vòlta Ciclista Catalonha 2018 qu’acabarà eth dia 25 en Barcelona e que passarà pera Val d’Aran es dies 23 e 24 de març.

En aguest 2018 era Vòlta tornarà a presentar un pannèu de gran nivèu. Ciclistes coma Alejandro Valverde, Nairo Quintana, Rigoberto Uran, Fabio Aru, Warren Barguil, Thibaut Pinot, Louis Meintjes, Sergio Luis Henao, Tejay Van Garderen, Simon e Adam Yates, Esteban Chaves, Michael Woods o Nacer Bouhanni, mercaràn ua setmana de fòrça espectacularitat e fòrça competitivitat.

Eth sindic d’Aran, Carlos Barrera, expliquèc que damb era arribada e gessuda d’etapa dera “Volta” 2018 ena Val d’Aran, se reafirme era apòsta deth Govèrn d’Aran entà restacar-se a grani eveniments esportius e sustot ath ciclisme, que compde damb un gran nombre d’aficionadi ena Val d’Aran que manten ua aufèrta unica en tot eth Pirenèu de rotes de ciclotorisme e de BTT damb mès de 400 Km de rotes omologades e accessibles entà toti es nivèus.

Eth sindic a arrebrembat que serà ua bona ocasion entà tornar a veir es melhors ciclistes deth mon coma ja auérem oportunitat de hè’c damb era etapa deth Tour de França deth 10 de junhsèga deth 2016 qu’auec era sua gessuda des dera Val d’Aran.

Pera sua part, eth president dera Volta Ciclista en Catalonha, Rubèn Peris, a comunicat qu’eth darrèr dia de competicion, en Barcelona, era Vòlta presente ua des sues granes novetats, era “reVolta”, era pròva femenina que se viuerà laguens deth circuit de Montjuïc per prumèr còp ath long dera istòria dera carrèra.

Enguan era Vòlta Ciclista Catalonha se poderà veir a trauès dera television enquia en 190 païsi des cinc continents.

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies