Notícies Slider

Es Pompièrs d’Aran celèbren un an mès Santa Barbara

Vielha, 4 de deseme de 2017.- Eth sindic d’Aran, Carlos Barrera, acompanhat deth director generau de Prevencion, Escandilhament d’Incendis e Salvament dera Generalitat, Juli Gendrau, e deth conselhèr delegat de Pompièrs Emergéncies, Joan Canalias, a presidit aué, dia 4 de deseme, es actes de celebracion de Santa Barbara, patrona deth còs des Pompièrs dera Val d’Aran.

Era celebracion a començat damb tòcs de sirèna pes pòbles dera Val d’Aran des coches des Pompièrs, a continuacion, s’a oficiat era missa ena glèisa de Santa María de Mijaran en aunor a Santa Barbara, e s’a sauvat ua menuta de silenci pes Pompièrs mòrti. Ath finalizar, es Pompièrs an celebrat eth dia dera sua patrona en parc de Pompièrs de Vielha damb toti es convidadi e eth rèste de ciutadans.

Ena sua intervencion, Juli Gendrau, a arregraït eth trabalh que realizen jornalièraments es Pompièrs d’Aran, e a destacat qu’eth nau modèl integrau de Pompièrs e Emergéncies que se desvolòpe ena Val d’Aran a de servir de modèl a aplicar en fòrça autes poblacions e parcs de pompièrs de Catalonha.

Er acte a finalizat damb era intervencion deth sindic d’Aran, Carlos Barrera, qu’ath delà d’arregraïr er inestimable prètzhèt des Pompièrs d’Aran, a volut destacar era importància dera incorporacion de 21 naui pompièrs volontaris, damb çò que se demòstre, didec, er esperit de renauiment.

Carlos Barrera, a soslinhat qu’era situacion politica que viu Catalonha, a empedit qu’eth nau modèl de gestion integrau de Pompièrs e Emergéncies dera Val d’Aran age ja entrat en foncionament, en tot soslinhar qu’an estat dus ans de longues negociacions en defensa d’aguest nau modèl entara val. Eth sindic d’Aran, s’a mostrat eplen d’esperança en que dempús des eleccions en Parlament de Catalonha deth 21-D e un còp nomentat eth nau Govèrn dera Generalitat, eth servici integrau de Pompièrs e Emergéncies dera Val d’Aran poderà entrar en foncionament, donques qu’a destacat, qu’ei un projècte globau e collectiu qu’er aspècte uman ei çò mès important dera sua estructura.

Eth sindic d’Aran, a finalizat era sua intervencion en tot desirar qu’ena pròplèu celebracion deth dia de Santa Barbara, patrona des Pompièrs d’Aran eth nau modèl sigue ja ua realitat.

Leave a Reply

Your email address will not be published. Required fields are marked *