Notícies

Espanha: la crisi en Catalonha e la deriva autoritària espanhòla marcan las eleccions de dimenge que ven

Dimenge venent, i aurà d’eleccions legislativas dins l’estat espanhòl, las quatrenas en quatre ans dins una situacion recòrd d’instabilitat politica amb l’incapacitat dels partits majoritaris d’arribar a d’acòrdis per formar un govèrn. Aqueste còp, la crisi de Catalonha a marcat la campanha electorala ont las cridas autoritaristas son de mai en mai evidentas.
 
Lo Partit Socialista (PSÒE) prenguèt lo poder amb una mocion de censura contra lo Partit Popular, que podiá pas pus téner fàcia a sos afars de corrupcion. Mas incapable de far d’acòrdis amb los partits que lo sostenguèron, e davant una situacion favorabla dels sondatges, lo primièr ministre en foncions, Pedro Sánchez, decidiguèt de tornar convocar d’eleccions. Pasmens, la virada dels eveniments en Catalonha après la publicacion de la senténcia contra los presonièrs politics a modificat radicalament aqueles sondatges.
 
Dins la campanha electorala, podèm soslinhar lo vam que lo pren l’ultradrecha pòstfranquista. Lo messatge masclista, omofòb e racista se mescla amb lo catalanofòb en revendicant l’abolicion de las institucions catalanas e lo contraròtle de las escòlas e los mèdias catalans pel poder central castelhan. Lo Partit Popular se sarra de mai en mai d’aquel messatge e los sondatges li preveson una pojada mentre que Ciutadans pòt patir una fòrta revirada, saique per aver ensajat de desguisar sas proposicions tanben d’extrèma drecha e per aver agit coma de vertadièrs provocaires.

Dins aquel panorama a estonat lo messatge autoritarista del PSÒE. Pedro Sánchez a promés dins sa campanha que menariá Carles Puigdemont davant la justícia espanhòla. Lo president catalan en exili li respondèt amb un vidèo en li demandant se lo voliá sequestrar: “Avètz solament dos biaisses de complir aquela promessa, e los dos son illegals”, çò diguèt Puigdemont en mençonant qu’un dels biaisses es de comandar la justícia en contravenent a la separacion dels poders e l’autre es de lo raubar. Dins aquel sens, recordèt qu’aquela practica l’aviá facha un govèrn del PSÒE fa qualques ans quand practicava lo terrorisme d’estat amb lo nomenat GAL.
 
La responsa de Sánchez foguèt encara mai inquietanta. Dins una entrevista de ràdio afirmèt que son govèrn comandava lo ministèri public e los procuraires.
 
En Catalonha se presentan los tres partits independentistas, e segon los sondatges, aurián la majoritat absoluda.
 
 

 


 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies