Notícies

Espanha: l’enfant raubada es condemnada a la preson per aver facha sa denóncia

Durant lo franquisme, las autoritats raubèron irregularament aperaquí 30 000 enfants que los donèron en adopcion a de familhas pròchas del regim. María Ascensión López es lo primièr d’aqueles enfants raubats a aver fach sa denóncia en justícia. Mas la consequéncia es qu’ela anarà en preson.
 
La justícia l’a condemnada per de calomnias contra la monja que de biais presumit auriá participat a son raubatòri. “L’acusi pas dirèctament a ela, mas dins los documents qu’ai i a son nom”, çò ditz López a prepaus de la monja. Pasmens, la justícia a pas pres en consideracion la denóncia de López mas la qu’a facha la monja, Dolores Baena. Ara, María Asunción López deu passar cinc meses en preson car pòt pas pagar los 43 000 èuros que correspondon a una multa de 3000 e 40 000 èuros en favor de la monja.
 
L’associacion SOS Enfants Raubats d’Almeria demandèt la gràcia al Conselh dels Ministres, en presentant 90 000 signaturas. Mas los ministres l’an refusada. Segon eldiario.es lo quite ministre de la justícia assolidèt qu’èra “un afar complicat” car aviá recebut “un rapòrt negatiu del tribunal qu’aviá prononciada la senténcia”.
 
María Asunción López es una femna de 53 ans, patís una incapacitat de trabalh e a dos enfants de 19 e 22 ans.
 
 
Los enfants raubats pel franquisme
 
L’afar dels enfants raubats es un dels episòdis negres de la dictatura del general Franco en Espanha. Entre los ans 1937 e 1950,  unes 30 000 enfants foguèron raubats a lors familhas. Qualques unes foguèron liurats a de familhas pròchas del regim, d’autres internats dins d’ospicis, convents o seminaris ont èran reeducats dins las idèas del franquisme. E mai qualques enfants foguèron asservits per de trabalhs agricòlas. TV3 ne realizèt un documentari fòrça complet.
 
María Ascensión López es lo primièr d’aqueles enfants raubats a aver portat l’afar en justícia, mas l’an condemnada a ela.

 



 
 

Leave a Reply

Your email address will not be published. Required fields are marked *