Notícies

Espanha refusa de negociar amb la Generalitat de Catalonha e mai lança un ultimatum

Lo president del govèrn espanhòl, Mariano Rajoy, mandarà al president de la Generalitat de Catalonha, Carles Puigdemont, una somacion per que diga s’a proclamat l’independéncia o non. Atal o diguèt Rajoy dins sa compareissença al Congrès dels Deputats espanhòl ont explicava la decision qu’avián presa de matin al conselh dels ministres a prepaus de l’afar de Catalonha e Aran.
 
E mai Puigdemont aguèsse dobèrta una pòrta al dialòg, Rajoy la barrèt completament amb lo sosten del Partit Socialista (PSÒE) e de Ciutadans. Lo cap espanhòl diguèt que parlariá amb Puigdemont sonque se “torna a la legalitat”, e mai afirmèt que “i a pas cap de mediacion possibla entre la lei democratica e la desobesissença e l'illegalitat”. Ansin, Rajoy a lançat un ultimatum a Puigdemont:  lo cap del govèrn espanhòl aplicarà l'article 155 de la Constitucion espanhòla s'abans lo 16 d'octòbre lo president catalan a pas levat la proclamacion de l'independéncia.
 
Rajoy afirmèt tornarmai que lo 1r d’octòbre i aviá pas agut nat referendum, car s’èra “desarticulat” gràcias a l’intervencion “professionala” de la polícia espanhòla, dicha nacionala, e la Gàrdia Civila, que saludèt e felicitèt de son prètzfach. “Es urgent de metre fin a la situacion que se viu en Catalonha”, çò assolidèt.
 
 
Los socialistas tanben refusan la mediacion
 
Per quant a ela, la pòrtavotz del PSÒE, Margarita Robles, demandèt a Rajoy un pauc d’autocritica mas diguèt qu’èra d’acòrdi amb son intervencion: “Nos fa pas mestièr d’autre  mediator que nosautres meteisses.” Tanben prepausèt una reforma de la Constitucion espanhòla dins sièis meses. Aquela proposicion auriá lo sosten del PP e de la Comission Europèa. Per contra, en Catalonha e Aran resolveriá pas res.
 
 
L’article 155
 
Lo govèrn espanhòl s’alestís ara per activar l’article 155 de la Constitucion espanhòla contra lo govèrn autonòm de Catalonha. Mas per o far deu èsser segur que la Generalitat a proclamada l’independéncia.
 
Aquel article prevei l’intervencion de l’autonomia amb la finalitat de preservar “l’unitat nacionala” [vòl dire estatala]. S’es pas jamai aplicat e lo tèxt especifica pas gaire quinas mesuras poirà prene Rajoy per obligar la Generalitat a complir sos òrdres.
 
 
“Tota possibilitat de negociacion ei barrada”
 
Dimars passat, se signèt la declaracion d’independéncia que demora en suspens per donar una oportunitat al dialòg e la mediacion.  Al moment de la signatura, la CUP demandèt un relambi maximal d’un mes per aquela suspension. “Mès, bon, dempús d’escotar Mariano Rajoy, tota possibilitat [de negociacion] ei barrada”, çò diguèt Mireia Boya.
 
Mentretant, Carles Puigdemont diguèt a la television estatsunidenca CNN, qu’el ofrissiá una negociacion entre dos interlocutors de la Generalitat e dos autres del govèrn espanhòl. 

 
 



 

Leave a Reply

Your email address will not be published. Required fields are marked *