Notícies Slider

Eth Conselh Generau d’Aran se hig ara prumèra campanha de matchfunding “Arraïtza-te Naut Pirenèu e Aran”

  • Aguesta iniciativa de micromecenatge preve ajudar a finançar projèctes damb retorn sociau enes territòris deth Naut Pirenèu e Aran e, en cas dera Val d’Aran, complemente eth procés participatiu impulsat peth govèrn aranés Aran Accion 20/30

Eth Conselh Generau d’Aran se hig ara convocatòria pilòt de finançament collectiu de projèctes damb retorn sociau ath territòri, “Matchfunding Arraïtza-te Naut Pirenèu e Aran”, qu’a coma objectiu contribuïr a méter en practica naues formules entà reactivar el teishit socioeconomic deth Naut Pirenèu e Aran.

Entath govèrn d’Aran aguesta campanha de matchfunding ei un bon complement entath projècte Aran Accion 20/30, que metec en foncionament eth Conselh Generau en inici dera pandèmia e qu’a estat un procès de debat dubèrt ara ciutadania entà consensuar possibles accions e linhes de trabalh tà poder hèr front as besonhs economics e laboraus dera Val d’Aran autant en present coma de cara ath futur.

En Arraïtza-te, es administracions publiques complementen damb un hons public de 24.000 euròs es aportacions dera ciutadania a trauès dera plataforma de micromecenatge goteo.org, un esturment digitau de finançament collectiu entath desvolopament de projèctes damb finalitats sociaus, culturaus, educatives… Ei previst invertir ath torn de 48.000 euròs en un maxim de 6 projèctes que s’escuelheràn, per part d’un jurat independent, en foncion des bases previstes.

Aguesta prumèra convocatòria conjunta dera Val d’Aran, Pallars Sobirà, Cerdanya, Alt Urgell, Alta Ribagorça e Pallars Jussà s’iniciarà eth pròplèu 19 d’octobre e finalizarà eth 13 de deseme, e s’i poderà presentar (damb un maxim de dus projèctes) quinsevolh autonòm, associacion, cooperativa o micro empresa qu’age sedença sociau o domicili en aguesti territòris.

Entà dar a conéisher aguesta convocatòria e ajudar a toti es interessats e interessades a premanir era candidatura des sòns projèctes, s’a previst un programa d’activitats que se començarà damb ues jornades comarcals a on se trabalharà com potenciar e explicar ben era prepausa de valor des iniciatives.

Eth networking dera Val d’Aran aurà lòc eth diuendres, 2 d’octobre. Posteriorament, eth dissabte 17 d’octobre, auràn lòc ues jornades virtuaus der ambit deth Naut Pirenèu e Aran entà trabalhar de forma conjunta e melhorar estrategies e aspèctes clau entà impulsar es projèctes a trauès deth micromecenatge.

Ei previst escuélher un projècte per cada territòri, damb un maxim de sies, qu’auràn d’auer un impacte positiu en tèrmes sociaus, de sostenibilitat, equilibri territoriau e innovacion. Un còp escuelhudi es projèctes, aguesti receberàn ua formacion e un acompanhament intensiu pendent eth mes de gèr de 2021 per part dera fondacion Goteo, entà dessenhar es respectives campanhes de comunicacion e micromecenatge.

Aguesta iniciativa ei promoguda peth Conselh Generau d’Aran e es Conselhs Comarcaus dera Alta Ribagorça, Alt Urgell, Cerdanya, Pallars Jussà e Pallars Sobirà, es servicis de promocion economica e trabalh d’aguestes institucions, es Oficines de Joenessa, er Ateneu Cooperatiu deth Naut Pirenèu e Aran e eth projècte Odisseu, damb eth supòrt dera Deputacion de Lleida, Deputacion de Girona, er Institut entath Desvolopament e era Promocion deth Naut Pirenèu e Aran (IDAPA), era DG de Joenessa, eth Consòrci GAL Alt Urgell – Cerdanya e eth Consòrci Leader Pirenèu Occidentau.

Eth procès preten dar contunhitat as jornades de networking professionau que s’an celebrat pendent es darrèri ans, e méter en practica atau naues formes de promòir era aucupacion e favorir sinergies entre eth teishit socioeconomic en actuau contèxte.

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies