Notícies Slider

Eth sindic d’Aran acòrde damb era Conselleria de Salut dera Generalitat eth pas dera Val d’Aran ara Fasa 2 de desescalada

  • Pendent era amassada mantenguda ager damb era consellera de Salut, eth sindic manifestèc qu’era situacion sanitària dera Val d’Aran ei estabilizada e acordèc procedir ara demana ar Estat deth pas ara Fasa 2 de desescalada, tostemp rebrembant eth besonh de seguir es mesures establides entà evitar un rebròt de contagis de COVID-19

Pendent era amassada mantenguda ager damb era consellera de Salut dera Generalitat, Alba Vergés, eth sindic d’Aran, Francés Boya, acordèc procedir ara demana ar Estat deth pas ara Fasa 2 de desescalada dera Val d’Aran (amassa damb era rèsta dera Region Sanitària deth Naut Pirenèu e Aran).

“En aguesti moments, era situacion sanitària dera Val d’Aran ei estabilizada, totun, mos cau èster prudents e, pendent aguesta transicion ara naua normalitat, non mos cau desbrembar qu’eth COVID-19 encara ei un perilh entara salut publica e mos cau evitar, a tota còsta, naui rebròts”, afirme eth sindic d’Aran.

En aguest sens, era vicesindica e conselhèra d’Igualtat, Salut e Benèster, Maria Vergés, manifèste que “passar ara Fasa 2 serie ua fòrça bona notícia entath territòri, mès ei de besonh complir tostemp es mesures establides pes autoritats sanitàries: respectar era distància de seguretat entre persones, hèr us dera mascareta, evitar aglomeracions e lauar-se fòrça soent es mans”.

En aguesta amassada virtuau damb era Conselleria de Salut, siguec present tanben eth conselhèr d’Economia, Torisme e Promocion economica, Juan Antonio Serrano, que considère qu’er auançament ara Fasa 2 supause “un pas mès ena activacion progressiva dera nòsta economia”.

Era Fasa 2 contemple mesures coma es visites as usatgèrs de centres residenciaus tàs persones granes en situacions exepcionaus, era dubertura ath public des establiments otelèrs e de restauracion entath consum laguens deth locau ath 40% dera sua capacitat, era ampliacion des velatòris a 25 persones en espacis ar aire liure o 15 en lòcs barrats, era dubertura d’equipaments culturaus a un tèrç de capacitat o era dubertura des piscines recreatives damb un limit deth 30%, entre d’autes.

 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies