Er òs ena Val d'Aran Miei Ambient Notícies Slider

Eth Sindic d’Aran s’amasse damb eth nau Govèrn dera Generalitat de Catalunya tà tractar es atacs d’ossi

Ena amassada se tractèren es atacs d’ossi que s’an produsit enes prumèrs mesi d’aguest 2018 e eth comportament der ós Goiat, unic exemplar que dispause d’equipament de seguiment.

Tanben era reiteracion de bèri atacs que s’an produsit en explotacions ramadères propères a nuclèus abitats dera Val d’Aran e que dispausauen de mesures de seguretat (barraments perimetraus e gossets de defensa).

 

 

Agèr, dijaus 7 de junh, eth sindic d’Aran, Carlos Barrera, eth conselhèr d’Agricultura, Ramaderia e Medi Naturau d’Aran, Jose Enrique Arró e eth conselhèr de Territòri d’Aran, Jose Antonio Boya, s’amassèren en Barcelona damb eth secretari generau de Territòri e Sostenibilitat dera Generalitat de Catalunya, Ferran Falcó, e damb eth director generau de Politiques Ambientaus dera Generalitat de Catalunya, Ferran Miralles.

Ena amassada se tractèren es atacs d’ossi que s’an produsit enes prumèrs mesi d’aguest 2018 e eth comportament der ós Goiat, unic exemplar que dispause d’equipament de seguiment. Tanben era reiteracion de bèri atacs que s’an produsit en explotacions ramadères propères a nuclèus abitats dera Val d’Aran e que disposauen de mesures de seguretat (barraments perimetraus e gossets de defensa).

En çò que tanh as desplaçaments, atacs e preséncia a pòca distància des nuclèus urbans que s’a pogut determinar damb exactitud per miei deth GPS de Goiat ua prumèra conclusion ei que cau aplicar mesures de persuasion entà sajar de corregir aguest comportament, e a compdar d’ara, quan se detectarà era proximitat d’aguest exemplar enes zònes de ramats o de proximitat a nuclèus abitats se haràn accions de desplaçament d’aguest exemplar.

En çò que tanh as auti exemplars que siguen localizadi enes proximitats des madeishes caracteristiques qu’er ós Goiat, s’aplicaràn dirèctaments es madeishes mesures.

Es pròplèus dies aurà lòc ena Val d’Aran ua amassada tecnica damb responsables deth Programa Ós dera Generalitat de Catalunya e de França entà comunicar-les es mesures prenudes des dera Val d’Aran e méter en comun tota era informacion per çò qu’ei des atacs e comportaments des ossi autant en Estat francés coma ena Val d’Aran e ena zòna deth Pirenèu catalan damb preséncia der ós.

Ena amassada d’agèr, tanben se tractèc era peticion formau qu’eth Conselh Generau d’Aran harà ath Departament de Territòri e Sostenibilitat d’un estudi juridic que determine era responsabilitat dera Generalitat de Catalunya coma Administracion signant deth prumèr Programa Life de reintroduccion der ós en Pirenèu laguens der encastre des atacs.

Ua auta demana que harà eth Conselh Generau d’Aran serà d’un estudi tecnic qu’analise era expansion e creishement que pòt suportar aguest territòri en tot compréner que damb er actuau numèro d’exemplars era problematica sociau e de pression sus eth sector ramadèr ei un punt fòrça critic.

Cau arrebrembar qu’eth Conselh Generau d’Aran a era responsabilitat deth seguiment e des indemnizacions des atacs d’ós e en cap cas se pòt decidir de forma unilaterau mesures de recapturacion e translocacion as lòcs d’origina de quinsevolh exemplar considerat que sigue conflictiu, aguesta decision a d’éster acòrdada per consens damb totes es parts implicades e èster activada pera Generalitat de Catalunya.

 

 

 

 

 

Vielha, 8 de junh de 2018

 

Conselh Generau d’Aran: Núria Sanjuan

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies