Aran verd biomassa cerdanya ecologisme Notícies Slider transicion ecologica

Eth sindic d’Aran visite es installacions de biomassa des bòsqui publics dera Cerdanya

  • Eth govèrn deth Conselh Generau d’Aran ei fòrça comprometut damb aguest projècte, pr’amor que gràcies ath profitament dera biomassa se pòt contribuir a mitigar es efèctes deth cambi climatic en tot hèr a servir ua energia renovable e de proximitat

Ager, 13 de hereuèr, eth sindic d’Aran, Francés Boya, e es conselhèrs de  Territòri, Paisatge e Gestion Ambientau, Francés Bruna e Oriol Sala, acompanhants per diferents alcaldes e alcaldesses dera Val d’Aran e representants deth Grèmi d’Ostalaria dera Val d’Aran, an visitat es installacions de biomassa municipals, magazems e tractaments silvicoles des bòsqui publics dera Cerdanya dera man des alcaldes de Martinet, Alp e Fontanals.

Pendent aguesta jornada, es representants aranesi tanben an visitat diuèrsi otèls a on era hònt d’energia ei era astera e an podut conéisher diferenti modèls de gestion d’aguesta energia atau coma era tecnologia que s’aplique enes caudères de biomassa.

Eth govèrn deth Conselh Generau d’Aran ei fòrça comprometut damb toti aqueri airaus qu’agen a veir damb era conservacion e proteccion deth medi ambient atau coma damb ua transicion ecologica justa e era biomassa pòt jogar un papèr prioritàri en aguest darrèr punt.

Des deth govèrn aranés se trabalhe ena implantacion d’un  projècte de gestion forestau e profitament dera biomassa, que segontes eth sindic d’Aran, “a coma objectiu qu’era Val d’Aran sigue capaç d’hèr ua gestion des pròpris bòsqui entà qu’aquera husta servisque entà alimentar es caudères de biomassa qu’ei previst installar enes edificis publics e que, de bèra manèra podesquem repréner era activitat ena politica forestau”.

Pera sua part, eth conselhèr Bruna soslinhe qu’auem “ath torn d’ues 15.000 tones de husta disponibles cada an e que, per tant, ei ua husta que s’a de profitar e que pòt milhorar, per ua part, era nòsta qualitat ambientau e, per ua auta, era economia des nòsti ajuntaments, pr’amor qu’ei un recors pròpri que sonque mos cau saber emplegar”.

Ath delà, damb aguest projècte se sajarie de contribuir a mitigar es efèctes deth cambi climatic en tot hèr a servir ua energia renovable e de proximitat.

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies