Actividades culturales Valle de Aran Activitats culturals Val d'Aran Jacint Verdaguer Maleïda 1882 Musèus Val d'Aran Notícies Notícies toristiques Setmana Maleïda

Èxit categoric ena estrea deth film Maleïda 1882 en Arties

  • Aguesta projeccion ère er acte de barrament dera Setmana Maleïda, organizada per Musèus Val d’Aran

  • Desenes de persones, entre eri eth sindic e era vicesindica d’Aran, assistiren ad aguest acte

Eth passat diuendres peth ser auec lòc era estrea deth film Maleïda 1882 en exterior dera glèisa de Sant Joan d’Arties. Aguesta projeccion atreiguec ua grana expectacion e desenes de persones poderen gaudir dera pellicula, basada en libre omonim de Bernat Gasull i Roig e que narre eth viatge de Jacint Verdaguer en tot trauessar es Pirenèus en cerca der Aneto.

Maleïda 1882 a estat dirigida per Albert Naudín e compde damb era interpretacion der actor Lluís Soler. Ath delà, eth rodatge compdèc damb era collaboracion deth Musèu dera Val d’Aran entara eleccion de localizacions (Ecomusèu Çò de Joanchiquet de Vilamòs), prèst de vestiari, contacte damb extres, èca.

Entre es assistents ara estrea se trapauen eth sindic e era vicesindica d’Aran, Francés Boya e Maria Vergés, eth conselhèr d’Economia, Torisme e Promocion Economica, Josep Canut, era conselhèra de Coneishement, Angelina Cases, eth tinent d’alcalde de Vielha e Mijaran, Alberto López, era directora de Musèus Val d’Aran, Carla del Valle, e eth director deth film, Albert Naudín, entre d’auti.

Aguesta projeccion ère er acte de barrament dera Setmana Maleïda, ua setmana tematica organizada per Musèus Val d’Aran que, segontes era sua directora, Carla del Valle, “mos a permetut conéisher era figura deth Verdaguer poèta e excursionista, mès tanben mos a servit de hiu conductor entà descorbir es nòstes montanhes, paisatges e legendes”.

En ostiu de 1882, Jacint Verdaguer gessec dera Seu d’Urgell e recorrec eth Pirenèu a pè en cerca dera Maleïda, qu’ère coma tradicionaument se coneishie ath tuc der Aneto. Un viatge que, en tot passar pera Val d’Aran, siguec era hònt d’inspiracion entà poder escríuer ua des sues òbres mèstres: Canigó.

Ena Setmana Maleïda i aueren conferéncies e gessudes ara montanha que, dera man der expèrt Bernat Gasull, serviren entà poder sénter e explorar en prumèra persona es impressions de Verdaguer, en tot recórrer parts deth sòn itinerari en Aran.

“Pendent es excursions auem compartit granes experiéncies damb es participants, en tot apréner valors sus eth companherisme, superacion e respècte ath miei ambient”, afirme era directora de Musèus Val d’Aran.

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies