Notícies

Human Rights Watch conclutz que la polícia espanhòla a passat l’òsca en Catalonha

Human Rights Watch (HRW) a realizada una enquèsta independenta e internacionala suls faches del 1r d’octòbre a Catalonha e Aran. Ne conclutz que la polícia espanhòla, dicha nacionala, e la Gàrdia Civila i faguèron un “usatge excessiu de la fòrça”. Las atacas dels agents espanhòls daissèron mai d’un milièr de ferits. Lo rapòrt de l’organizacion umanitària se basa sus l’analisi de vidèos e de fòtos de ja jornada, sus las versions de mai d’un testimòni, sus de victimas de la violéncia policièra, e de pròvas medicalas.
 
“La polícia aviái bensai la lei de son costat, mas aquò li donava pas lo drech d’emplegar la violéncia contra los manifestants pacifics”, çò ditz l’enquestaire Kartik Raj. “En aqueles moments de conflicte, es especialament important que las autoritats respècten los dreches umans, compresas la libertat d’expression e de reünion, e l’estat de drech”, çò apond lo document. Tanben fa una crida a Espanha e a Catalonha a cooperar amb una enquèsta internacionala e independenta sus la violéncia del 1r d’octòbre.
 
HRW ramenta que la polícia espanhòla, la Gàrdia Civila e los Mòssos d’Esquadra avián l’òrdre d’arrestar lo referendum en respectant “la coexisténcia entre los ciutadans”, e assegura que las fòrças espanhòlas i respondèron amb violéncia. L’organizacion umanitària s’es centrada suls cases de violéncia a Barcelona, Girona, Aiguaviva e Fonollosa, mas ditz qu'a recebut d'allegacions e de pròvas materialas d’autras atacas e maltractaments que, per ara, a pas pogut verificar.
 
Expausa tanben la posicion del govèrn espanhòl, que pretend que l’accion policièra foguèt “prudenta, apropriada e proporcionada”. En s'adreiçant a l’executiu de Rajoy, ditz que “lo govèrn espanhòl a l’obligacion d'assegurar una enquèsta eficaça sus l’usatge excessiu de la fòrça”, e li recomanda que demande la collaboracion d’una institucion expèrta independenta e internacionala.
 
HRW recòrda que l’estat espanhòl es membre de la Convencion Europèa dels Dreches Umans e de la Convencion Internacionala dels Dreches Civils e Politics, e deu doncas respectar lo drech de reünion e la libertat d’expression. Ansin, pòt pas far un usatge excessiu de la fòrça e mai se qualques ciutadans agisson “de manièra illegala”, perque los pòt pas privar de lors dreches, e mai insistís que los còrses policièrs an un còde etic per evitar l’usatge excessiu de la fòrça.
 


 

Demoledor informe de HRW contra la violència policial al 1oct "Spain: Police Used Excessive Force in Catalonia" https://t.co/iEBJde1Xwt

— Carles Puigdemont (@KRLS) 12 d’octubre de 2017
 
 



 

Leave a Reply

Your email address will not be published. Required fields are marked *