Notícies

I aurà un candidat de lenga occitana a la presidenciala francesa, Jean Lassalle

Dissabte 18 de març, lo Conselh Constitucional francés anoncièt la lista dels onze candidats qu’an superat l’obstacle dels 500 pairinatges d’elegits per se presentar a l’eleccion presidenciala. Amb 708 signaturas validadas, ne fa partida lo deputat centrista bearnés Jean Lassalle, que parla la lenga nòstra. Lo coneisson per aver cantat en 2003 l’imne occitan per protestar pendent una sesilha de l’Assemblada Nacionala francesa, e per aver facha una cauma de la fam de 39 jorns, en 2006, per fin de salvar una usina de la Val d’Aspa. Per far campanha, s’èra retirat de son partit, lo Movement Democrata, qu’èra son vicepresident, mentre que son president, François Bayrou, decidiguèt de sosténer la candidatura centrista e liberala d’Emmanuel Macron.
 
Los autres 10 candidats, son, segon l’òrdre aleatòri causit pel comunicat del Conselh Constitucional, Nicolas Dupont-Aignan (De pè, França!), Marine Le Pen (Front Nacional), Emmanuel Macron (En Marcha!), Benoît Hamon (Partit Socialista), Nathalie Arthaud (Lucha Obrièra), Philippe Poutou (Nòu Partit Anticapitalista), Jacques Cheminade (Solidaritat e Progrès), Jean-Luc Mélenchon (La França Insomesa), François Asselineau (Union Populara Republicana) e François Fillon (Los Republicans).
 
 
Temaru e Troadec eliminats
 
Per contra e contràriament a çò que o aviá anonciat, l’independentista polinesian Oscar Temaru poirà pas concórrer a la presidenciala francesa. Voliá far de l’eleccion presidenciala un referendum sus l’independéncia de son país mas obtenguèt solament, segon lo Conselh Constitucional, 109 dels 500 pairinatges de besonh. Los recebèt mai que mai de Polinesia, de Nòva Caledònia e de Corsega.

Tanpauc se presenta pas Christian Troadec qu'aviam sostengut la còla de Jornalet. Lo candidat breton se retirèt en veire que podiá pas aténher las 500 signaturas demièg los 47 000 elegits que i a en Republica Francesa. Per ansin, aviá fach amb cinc autres candidats, una crida contra contra “lo verrolh antidemocratic dels grands partits”.









 

Leave a Reply

Your email address will not be published. Required fields are marked *