camins medi ambient medi naturau Miei Ambient Notícies SAVA Slider

Intens trabalh aguest ostiu entara conservacion des accèssi ath miei naturau

  • “Sajaram, cada an, d’incrementar era partida destinada ad aguesti trabalhs entà arribar a realizar actuacions en toti es accèssi d’interès tant toristic coma ramadèr”, afirme eth conselhèr de Territòri, Paisatge e Gestion ambientau

  • En junh se contractèren dètz persones a trauès deth SOC tà dar supòrt as efectius dera enterpresa SAVA S.L. e poder realizar aguesti servicis damb inmediatetat

Des deth començament der ostiu, eth Conselh Generau d’Aran, a trauès dera enterpresa Servicis Ambientaus dera Val d’Aran (SAVA S.L), a amiat a tèrme diuèrsi trabalhs de milhora, neteja e manteniment des accèssi ath miei naturau e camins.

En mes de junh se contractèren dètz persones a trauès d’ua aufèrta de trabalh en categoria de peon en Servici Public d’Aucupacion de Catalonha (SOC) tà dar supòrt a SAVA e poder realizar aguesti servicis damb inmediatetat, entà poder arrecéber as usatgèrs des camins enes milhors condicions possibles.

Pendent aguesti mesi s’a hèt ua neteja intensiua dera vegetacion des camins vesiaus de Garòs enquia Pontaut, atau coma quauqu’un de nauta montanha coma eth camin der aigua ena Artiga de Lin, refugi-pomèro, o eth camin caudèra, entre d’auti.

Entà aguestes actuacions s’a trabalhat damb mès de 10 desbrossadores manuaus de hiu, podalhs e bohadèrs. Pendent part deth mes d’agost se contunharà damb aguesti trabalhs enes camins de Bausen-Saplan-Les e eth Camin Espalias.

Per un aute costat, aguesti efectius tanben dan supòrt as diuèrses corses e caminades que s’organizen en país coma era Corsa d’Aran per sa Lengua, era Corsa des 15 pòbles, era Lairissa Bike, Era Verticau, èca. A mesura que s’apròpen es dates de realizacion d’aguestes competicions, se netegen e repassen es camins per a on an de passar es participants, entà que se trapen eth miei naturau enes milhors condicions possibles.

Finauments, aguesta brigada realize tanben era neteja dera vegetacion des lateraus des accèssi as nuclèus abitats e as pistes forestaus. En aguesti moments s’està netejant Ròca de Serra e dempús se contunharà damb Varradòs, Arres-Bossòst e Sant Joan de Toran. En acabar, se tornarà a hèr ua dusau passada.

“Des deth departament de miei ambient sajaram, cada an, d’incrementar era partida destinada ad aguesti trabalhs de neteja e manteniment des accèssi ath miei naturau entà arribar a realizar actuacions en toti es accèssi d’interès tant toristic coma ramadèr”, afirme eth conselhèr de Territòri, Paisatge e Gestion ambientau, Paco Bruna, que hig que “entà un territòri coma era Val d’Aran, damb un auviatge naturau tant considerable coma eth nòste, ei important amiar a tèrme aguest tipe d’accions de forma regular e damb era inversion avienta”.

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies