Notícies

La Cort Suprèma espanhòla es a decidir se destituís lo president de la Generalitat de Catalonha

Lo president de la Generalitat de Catalonha, Quim Torra, compareguèt ièr a miègjorn davant los jutges de la Cort Suprèma de Madrid, que deu decidir de sa destitucion. L’avián jutjat en novembre de l’an passat per aver mantengut sul balcon del palais de la Generalitat una bandeiròla que demandava la libertat dels presonièrs politics, çò que lo Conselh Electoral de l’estat espanhòl aviá enebit. Ara, cinc jutges de la segonda sala de la Cort Suprèma espanhòla devon decidir dins los jorns avenidors se destituisson lo president catalan, çò que seriá un fach inedit, mas probable.
 
L’avocat del president catalan, Gonzalo Boye, assegurèt que s’èra mancat al drech a la libertat d’expression dels representants politics e diguèt als jutges que se fasiá una persecucion de la “minoritat nacionala catalana”. Dins son argumentacion, Boye defendèt que lo Conselh Electoral a pas drech d’obligar lo president que retire una bandeiròla. Lo ministèri public e la partida civila, lo partit ultradrechista Vox, argumentèron que lo president catalan aviá “adaptat las règlas segon sa convenença” e qu’aviá profechat d’aquel procès per far una campanha politica.
 
 
“Puniment de tot un país”
 
Après la sesilha, Torra compareguèt davant los mèdias e parlet sens sal ni pèbre. “Aquò es pas un puniment de ieu per la bandeiròla, mas de tot un país al mitan d’una pandemia”. Dins aquel sens, Torra faguèt una longa lista de grèuges que l’estat espanhòl a causats a Catalonha e al movement independentista.
 
“Vivèm dins un estat que calciga las nocions pus basicas de la democracia”, çò diguèt en soslinhant que “totes los aparelhs de l’estat se son activats per evitar la reüssida d’un projècte democratic e pacific. Diguèron que democraticament e pacificament poiriam parlar de tot, e avèm uèi de mond en exili per de delictes d’opinion, e de mond que passan 23 oras sus 24 dins una cellula. Nos ven dirèctament al cap la violéncia policièra del 1r d’octòbre. Quina messorga!”.
 
Es atal que Torra encastrèt sa destitucion dins “aquela tièra d’ipocrisias”.
 


 
Tot aquò per una bandeiròla
 
Per las eleccions legislativas d’abril de 2019, lo Conselh Electoral de l’estat espanhòl aviá enebit tot simbòl de sosten als presonièrs politics catalans dins los edificis e mèdias publics. O faguèt en seguida del partit espanholista Ciutadans, que considerava que s’agissiá de simbòls partisans que podián influenciar lo vòte.
 
D’efièch, lo govèrn espanhòl aviá demandat a la polícia catalana, los Mòssis d’Esquadra, que levèsson eles los ribans jaunes. E dins aquel sens d’agents intrèron dins las escòlas per retirar totes los ribans jaunes del temps que la television de Barcelona, Betevé, se vesiá obligada de levar l’etiqueta “presonièrs politics” de son sit web d’informacions.
 
Quand lo Conselh Electoral prononcièt son interdiccion, lo president Quim Torra refusèt de retirar la bandeiròla del palais de la Generalitat. Puèi, en seguida de la demanda del mediator de Catalonha, Rafel Ribó, cambièt la bandeiròla per una autra sens riban jaune. Enfin, foguèt forçat de la levar, e en sa plaça n’i placèt una autra que revendicava la “libertat d’opinion e d’expression” en mençonant l’article 19 de la Declaracion Universala dels Dreches Umans.

 





 
 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies