Notícies

La justícia espanhòla ven d’anullar formalament la senténcia contra Arnaldo Otegi e los autres basquistas

La Cort Suprèma espanhòla a reconeguda son error dins l’afar Bateragune e a anullada la senténcia contra Arnaldo Otegi, Jacinto García, Rafael Díez Usabiaga, Miren Zabaleta Tellería e Arkaitz Rodríguez Torre. O a fach dètz ans après la condemnacion e gaireben dos ans après que la Cort Europèa dels Dreches Umans de l’Union Europèa (CÈDU) prononcièt una senténcia contra la justícia espanhòla per aver pas garentit un jutjament just en aquel afar.
 
Per tant, malgrat la senténcia de la CÈDU e l’anullacion de la senténcia de la justícia espanhòla arriban quand los injustament condemnats an complit integralament lors penas de mai de sièis ans de preson. La decision de la cort espanhòla anulla tanben l’inelegibilitat d’Otegi, e arriba just après las eleccions al parlament basco del 12 de julhet passat.
 
 
La CÈDU denoncièt Espanha per manca d’imparcialitat
 
En novembre de 2018, la cort Europèa dels Dreches Umans de l’Union Europèa (CÈDU) prononcièt una senténcia contra la justícia espanhòla per aver pas garentit un jutjament just a Arnaldo Otegi. La cort d’Estrasborg conclusiá que lo tribunal espanhòl que lo jutgèt per un delicte d’apertenéncia a ÈTA respectèt pas los dreches fondamentals d’Otegi, que passèt sièis ans embarrat en preson e que puèi foguèt condemnat a dètz ans d’inelegibilitat.
 
La senténcia europèa declarava que s’èra producha una violacion de l’article 6.1 de l’Acòrdi Europèu dels Dreches Umans contra Arnaldo Otegi, Jacinto García, Rafael Díez Usabiaga, Miren Zabaleta Tellería e Arkaitz Rodríguez Torre, totes condemnats dins aquel jutjament. Totes denoncièron a la CÈDU per manca d’imparcialitat la jutgessa presidenta del tribunal que los condemnèt.
 
 
Sièis ans e mièg en preson per aver creat un espaci politic
 
Embarrat en preson sièis ans e mièg per aver volgut crear un espaci politic ont i aguèsse pas de plaça per la violéncia, lo cap independentista basco foguèt acusat d’aver ensajat de rebastir lo partit illegalizat Batasuna. Cal dire que Batasuna foguèt pas jamai illegal en Euskadi Nòrd, e i tenguèt normalament son activitat fins a la data de sa dissolucion, anonciada a Baiona lo 3 de març de 2013.
 
Otegi sortiguèt de la preson lo 1r de març de 2016, e l’estat espanhòl l’invalidèt politicament fins en 2021. Ça que la, Otegi demandèt l’opinion de la Cort Europèa dels Dreches Umans.

 


 


 
 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies