Notícies

La mitat de las personas LGBTI an patit un secutament dins los darrièrs dotze meses

La commemoracion del Jorn de la Liberacion LGBTI, que remembra las susmautas d’Stonewall del 28 de junh de 1969, serà ongan una de las mai descoloridas a causa de la pandèmia de la covid-19. Totun, s’es organizat fòrça manifestacions de tota mena per que la revendicacion de las Fiertats LGBTI demòre totjorn en vigor. Mentretant, un sondatge realizat sus 40 000 personas, lo pus grand jamai fach en Euròpa sus la question, assegura que dins los darrièrs dotze meses la mitat de las personas LGBTI an patit un secutament.
 
Dins de cases encara mai extrèmes, de quatre parts dels sondats una ditz qu’a subit d’atacas fisicas o sexualas dins las darrièras cinc annadas. Dins lo collectiu, las personas transgenres o intersexualas son las que patisson mai d’agressions fisicas e sexualas, un 34% e un 39%, respectivament. Quant als assalhidors, son mai que mai d’òmes, un 77%, del temps que las femnas representan lo 13% dels agressors.
 
Las atacas an d’efièches clars sul comportament de las personas LGBTI. Lo 61% d’elas evita de se téner per la man en public amb son calinhaire per paur d’èsser atacats, menaçats o secutats. O ditz lo 72% dels sondats de l’estat francés e lo 48% de l’estat espanhòl.
 
Dins l’encastre europèu, los païses ont mai s’evita de se sarrar la man son Serbia (un 87%) e Macedònia (un 86%). Los estats de l’èst d’Euròpa son los ont i a mai de discriminacion. Polonha e França se destacan pel fach d’èsser los sols estats que la majoritat de las personas LGBTI considèren qu’a aumentat la violéncia e la intolerància dins las darrièras cinc annadas, e ne responsabilizan mai que mai los partits politics.
 
Dins l’estat espanhòl, l’11% ditz qu’a denonciat a la polícia d’agressions fisicas o sexualas pel fach d’èsser LGBTI, e environ lo 20% dels sondats o an pas denonciat per paur de recebre un tractament omofòb de part dels agents de polícia. Gaireben lo 60% considèra que lo govèrn espanhòl combat pas brica amb eficacitat los prejutjats e l’intolerància contra lo collectiu LGBTI.
 
 
Una discriminacion enrasigada
 
Lo sondatge met tanplan en evidéncia que la discriminacion devèrs las personas LGBTI comença a l’edat escolara. Près la mitat del LGBTI foguèron de victimas de secutament escolar —un 49% dins l’estat espanhòl e un 44% dins l’estat francés— e la discriminacion se manten en percentatges similars, compte tengut que lo 42% dels ciutadans del collectiu LGBTI declara qu’es estat discriminat dins los darrièrs dotze meses en qualque aspècte sa vida, coma o pòt èsser a l’ora de cercar un emplec, pendent de moments de léser o en anant al mètge.
 
Aquò compelís tanben lo 26% d’eles d’escondre son orientacion sexuala o son identitat de genre al trabalh, e un 53% d’o amagar a qualques personas de son entorn professional; valent a dire qu’environ lo 75% de las personas LGBTI o escondon al trabalh, amb mai o mens d’intensitat. Demest las personas trans o intersexualas lo percentatge es mai que mai naut: un 39% amaga totalament son identitat al trabalh e lo 48% o dissimula d’una manièra selectiva; a l’encòp, mai de la mitat a patit un secutament escolar e un 61% es estat discriminat dins la darrièra annada.
 
 
“Tròp de personas LGBTI contunhan de demorar dins l’ombra per paur d’èsser ridiculizadas, discriminadas e mai assautadas”
 
En seguida de la publicacion del sondatge, lo director de l’Agéncia Europèa dels Dreches Fondamentals, Michael O’Flaherty, a dich que los resultats demostravan lo pauc progrès obtengut dins las darrièras sèt annadas, abans de conclure: “Tròp de personas LGBTI contunhan de demorar dins l’ombra per paur d’èsser ridiculizadas, discriminadas e mai assautadas”.

 
 
 

 




 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies