Notícies

L’educacion publica francesa ofrís solament un pòst per l’agregacion per l’occitan en 2018

Una agregacion per l’occitan es creada, çò anonciàvem en març passat tot contents, aquò voliá dire que los professors d’occitan —e d’autras lengas— poirián enfin passar amb lor disciplina lo concors de recrutament mai naut de l’ensenhament public segondari. Mas ailàs, l’Educacion francesa, dicha Nacionala, a ofèrt solament un pòst per aquela agregacion. E mai d’aquò, pel concors de nivèl inferior, lo CAPES, i a solament convocats 4 pòstes per l’occitan.
 
La FÈLCO, que se regaudissiá de l’anóncia de l’agregacion en març passat, a reagit amb indignacion, çò publica La Setmana.
  “Apondèm a aquò que lo nombre de pòstes al CAPES 2018 es pas que de 4 (siá una baissa de 33 % per rapòrt a la session 2017), e que l’espaci occitan compta 32 departaments, qu’una bona part an pas cap de professor del segond gra titular (Ardecha, Droma, Cruesa, Corresa, Nauta Vinhana, Puèi Domat, Alps de Nauta Provença , Nauts Alps), e mesuram l’amplor del mesprètz de cap a una lenga pr’aquò inscricha dins lo patrimòni nacional (Art. 75.1 de la Constitucion). Del temps de la campanha presidenciala, lo candidat Emmanuel Macron, qu’afortís que fai totjorn çò que ditz, explicava que facilitariá, «tre l’escòla, l’aprendissatge de las lengas e culturas regionalas, que lor interès educatiu, lingüistic e cultural es reconegut.». Lo quite sénher Macron que s’estrambordava a Pau lo 12 d’abril passat sur aquela «França plurala» e «sas bèlas lengas regionalas» que, çò disiá «vòli reconéisser e reconeisserem»".  
La FÈLCO a mandat una letra al Ministèri de l’Educacion dicha nacionala, e a bandida una peticion publica que podètz signar sus aqueste ligam.
 
 
 



 

Leave a Reply

Your email address will not be published. Required fields are marked *