Notícies

Lo cambajon (de York) a quina per Tolosa?

D’Austràlia en Euròpa, la darrièra jornada de la fasa de classament permet de saupre (enfin) lo nom dels qualificats e, per la Superliga, l’esquipa que davalarà a l’escalon inferior.

Championship: Tolosa soslèva las pèiras a Featherstone
 
A Featherstone, la victòria èra imperativa pel Tolosa Olimpic per servar la segonda plaça. Las causas comencèron plan mal: los occitans se trapèron menats 18-0 e perdèron, sus nafradura, una pèça màger: l’alièr Bergal. Mas, a la pausa, los Blaus èran tornats a 18-8 e, dins lo segond temps, capvirèron la partida per s’impausar sul fil 26-24.
 
La formula de las pelhòfas utilizada permet als primièrs 3 del classament de pèrdre una partida sens èsser definitivament eliminats; pel primièr torn, Tolosa reçauprà dissabte a Blanhac los tresens: York. Lo venceire anirà jogar cò de Toronto lo segond torn.
 
Es un pauc complicat mas vos expliqui aquel sistèma ont una formacion desapareis a cada torn:
  — Primièr torn:  Partida A: segond contra tresen (Tolosa-York) ; partida B: quatren contra cinquen (Leigh-Featherstone)  
— Segond torn:  Partida C: primièr (Toronto) contra venceire A; Partida D: perdent A contre venceire B  
— Tresen torn: Partida E: Perdent C-Ganhant D  
— Finala entre los venceires de las partidas C e E.  
Mas vos contarem aquò torn aprèp torn! De son costat, Whitehaven, campion de la League One, jogarà en Championship l’an que ven. Rochdale (una sola victòria dins la sason) e Barrow fan lo camin invèrs.
 
 
Superleague: Salford en pelhòfas; qual en Championship?
 
Pels Dragons Catalans, èrem plan luènh de l’ambient (e de la victòria) del 18 de mai a Barcelona fàcia a Wigan. Cò dels campions, los darrièrs valids sang e aur poguèron pas res faire fàcia a una formacion segura d’ela: desfaita catalana 46-12. Per la pichona istòria, se notarà que totes los punts catalans foguèron marcats per d’ancians jogaires de Wigan.
 
Salford va ganhar a Leeds 20-12 e serà dels cinc qualificats per las pelhòfas. Los Tigres de Castleford baton 44-12 Hull FC, longtemps tresen al classament, e i passan davant per la cinquena e darrièra plaça qualificativa. Per la darrièra jornada, divendres de ser, Hull FC reçauprà St Helens e Castleford jogarà a Wigan. Batèsta a distància doncas per aquesta cinquena plaça!
 
En coa de classament, la situacion es encara mai complèxa: Londres va ganhar dins las darrièras minutas cò d’Hull KR 20-16 e pòt encara esperar de se salvar.
 
Quatre formacions son a egalitat de punts: 20 punts per Wakefield (- 124), Huddersfield (- 207), Hull KR (- 219), Londres (-273).
 
Per la darrièra jornada, divendres: Huddersfield reçauprà los Dragons; Hull KR anirà desfisar Salford e afrontament entre dos concernits per la davalada en Championship amb la partida (de la mòrt?) Wakefield-Londres.
 
 
NRL: las Làmias, ueitenas
 
En NRL (www.nrl.com ), se jogava la darrièra partida de la primièra fasa. Los Lapinons ganhan lo dèrbi de Sydney contra los Polets 16-10. Las doas formacions se tornaràn trapar per la primièra jornada de la segonda fasa. Canberra, que podiá finir tresen, se fa batre pels Combatents-NZ 24-20. Dins la partida decisiva per la darrièra plaça qualificativa, las Làmias de Cronulla van ganhar cò dels Tigres 25-8.
 
Al primièr torn, aurem doncas las partidas:
  — dins lo naut del tablèu: Melbourne-Canberra; Polets-Lapinons. Los ganhants en mièja finala, los perdents en barratge.
 
— dins lo bas del tablèu: Parramatta-Brisbane; Manly-Cronulla. Los ganhants en barratge, sason acabada pels perdents.  
En defòra dels Titans, qu’acaban la sason amb solament 5 victòrias, las autras formacions èran pas luènh d’una possibla qualificacion: doas o tres resultas diferentas e tot èra possible dins aquesta competicion plan dobèrta. 

 
 
 
 
Alan Roch
 
 
 
 
 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies