Notícies

Londres: M.I.A. a fach un concèrt davant l’Home Office per demandar la liberacion d’Assange

La cantadora de rap d’origina tamila M.I.A. faguèt dimars passat a Londres un concèrt particular davant lo Ministèri de l’Interior britanic per protestar contra l’encarceracion del fondador de Wikileaks, Julian Assange. Tanben se produguèt lo cantador de rap britanic Lowkey. Lo concèrt se debanèt jos lo lèma “non a l’extradicion d’Assange” e i assistiguèron de centenats de personas.
 
M.I.A e Assange son d’amics dempuèi longtemps. Ela l’a vesitat mai d’un còp en preson.
 
A l’ora d’ara, Assange complís una pena de cinquanta setmanas de preson al Reialme Unit per aver pas respectada la libertat condicionala qu’aviá per una acusacion de viòl en Suècia en se refugiant dins l’ambaissada de l’Eqüator a Londres, ont demorèt sèt ans. En abril, lo president eqüatorian Lenín Moreno li retirèt l’asil politic e permetèt que la polícia britanica lo detenguèsse.
 

MIA concert outside Home Office with crowds of supporters demanding that Julian Assange isnt deported for exposing US war crimes, illegal mass surveylance and state corruption. Julian is telling the truth but truth is treason in an empire of lies - Orwell pic.twitter.com/ilUSr3k5QG

— Tracy Worcester (@TracyWorcester) November 5, 2019
 

Rapper MIA and fashion designer Vivian Westwood at protest against extradition of Julian Assange https://t.co/zd8fPxPzCq pic.twitter.com/NMmIWe5ZQc

— kellyman (@kelie003) November 6, 2019
 
 
Un raportaire de l’ÒNU ne demanda la non-extradicion
 
Lo raportaire especial de l’ÒNU sus la tortura e los tractaments crusèls, inumans o degradants, Nils Melzer, avertís del “risc real de violacions dels dreches umans” se concedisson l’extradicion de Julian Assange als Estats Units. Melzer o diguèt dins un comunicat publicat lo 31 de mai passat après vesitar lo jornalista dins una preson de Londres.
 
Segon Melzer, als Estats Units Assange risca de patir de violacions de sa libertat d’expression, del drech a un jutjament just e de la proïbicion de la tortura. En particular, l’expèrt se mòstra “alarmat” per l’anóncia recenta del Departament de Justícia estatsunidenc de 17 nòvas cargas contra Assange segon la Lei de l’Espionatge, que lo poirián condemnar fins a 175 ans de preson o quitament a la pena capitala.
 
 
 
Chelsea Manning
 
Quant a Chelsea Manning, ela es tornarmai encarcerada. Una de las darrièras decisions de Barack Obama, tres jorns abans de quitar la presidéncia dels Estats Units, foguèt de comudar la pena de Manning, condemnada a 35 ans de preson per aver passat a Assange sèt cents mila documents classats del govèrn dels Estats Units, que l’organizacion WikiLeaks difondèt puèi. La decision d’Obama arribèt tres jorns abans que quitèsse l’Ostal Blanc, en genièr de 2017. Mas la libertat de Manning es estada brèva. L’8 de març passat, tornava èsser encarcerada. La rason es qu’ela refusèt de respondre davant una jurada sus una enquèsta pertocant WikiLeaks. “Participarai pas a de procèsses secrets e ne refusi moralament un qu’es estat emplegat per arrestar e perseguir d’activistas a causa de lor discors politic”, çò diguèt segon AP.
 
Dins aquesta segonda detencion, l’an tornarmai embarrat dins una cellula d’isolament, segon çò qu’a denonciat lo grop de sosten a Manning nomenat “Chelsea Resist!”. Lo 4 d’abril passat, lo compte oficial de Twitter de la detenguda raportèt qu’avián mes fin a aquela situacion, après qu’aguèt passat 28 jorns en aquela situacion.
 
Aqueste còp, sembla que l’Ostal Blanc favorirà pas la situacion de Manning, se prenèm en compte qu’al començament de 2017 Donald Trump diguèt qu’èra una “traita ingrata” (ungrateful traitor) que “jamai deviá pas èsser mesa en libertat”.
 
Nascuda Bradley Manning, èra analista d’intelligéncia de las Fòrças Armadas dels Estats Units e passèt a Wikileaks de documents classats sus las guèrras d’Iraq e d’Afganistan; d’autres documents provoquèron una granda polemica internacionala quand foguèron publicats en 2010.
 
Dins son jutjament, en julhet de 2013, Manning foguèt declarada innocenta del delicte d’aver ajudat l’enemic dins l’afar Wikileaks, çò que li evitèt d’èsser condemnada a perpetuitat, mas foguèt declarada colpabla dels autres dètz e nòu delictes que n’èra acusada. Manning foguèt arrestada en mai de 2010 e empresonada tres ans en esperant aquel jutjament. La mitat del temps lo passèt estremada dins una cellula de 4,46 mètres cairats.
 
Pendent son procès, Manning demandèt perdon. “Me grèva d’aver greujats los Estats Units”, çò diguèt.
 




 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies