Notícies

Los filistèus èran d’europèus

Un nòu e estonant estudi genetic pòt cambiar lo vejaire qu’avèm uèi lo jorn sus d’ancianas populacions de Pròche Orient. Una còla internacionala d’arqueològs analisèt l’ADN de fins a dètz individús de l’Edat del Bronze e del Fèrre de la vila filistèa d’Asquelon. Lo resultat es tras qu’interessant pr’amor que confirma que l’origina d’aquela populacion seriá europèa.
 
Per ansin, los cercaires trapèron que l’origina europèa d’aqueles individús arribèt a aquela vila filistèa aperaquí a l’epòca que se pensava que i èran arribats los filistèus. Aquò fa pensar que los ancessors d’aquestes aurián emigrat a travèrs la Mediterranèa en tot arribar a Asquelon pendent l’anciana Edat del Bronze. Gaire puèi, aquel compausant genetic europèu se seriá perdut pr’amor del crosament amb la populacion locala.
 
Aquò arriba après que s’es conegut que los filistèus, tradicionals enemics dels ebrieus, aurián coma origina la vila de Caftor, çò es lo nom ancian de la vila o de l’illa de Creta. E ja fa mai d’un sègle que plusors egiptològs prepausèron que lo grop classat coma peleset dins d’ancians tèxtes egipcians del sègle XIIn abans lo Crist èran de filistèus.
 
Aqueles egiptològs confirmèron que los pelesets èran arribats dempuèi las illas e qu’aurián atacat Chipre e puèi las còstas de Turquia e de Siria abans d’envasir Egipte. Aquò seriá la primièra e mai anciana pròva de l’origina europèa dels filistèus pendent lo segond millenari abans lo Crist dins la region.
 

De cambiaments d’estil de vida
 
“Avèm trobat de cambiaments significatius del tipe de vida pendent lo sègle XIIn abans lo Crist que menan dirèctament a l’arribada dels filistèus dins l’airal, çò diguèt Daniel Master, arqueològ del Musèu Semitic d’Harvard. Fins ara se pensava qu’èran la resulta del comèrçi e d’escambis culturals e pas de migracions umanas”.
 
Aital, segon los cercaires qu’an fach aquel nòu estudi (après 30 annadas de trabalh en recèrca genetica), los filistèus serián pervenguts al Levant pr’amor d’una migracion qu’aguèt coma origina l’oèst. Aital o confirmariá l’estudi d’ADN dels 10 individús d’Asquelon de las Edats del Bronze e del Fèrre. (Legissètz la seguida)


  Aqueste article es  publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.






Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies