Notícies

Madagascar: la pièger ataca de pèsta bubonica

Madagascar voldriá plan finir pendent las semanas venentas un dels episòdis de pèsta bubonica pus grèus qu’aja patits aquel país e tota Africa pendent los darrièrs tempses. Totun, la malautiá pot ja èsser considerada coma endemica dins l’illa e gaireben cada an s'enregistra aperaquí 600 cases entre los meses de setembre e abril. Pasmens, ongan, entre los meses d’agost e setembre ja i aguèt 1947 cases e 143 mòrts.
 
Aital, la majoritat de las mòrts son “estadas consequéncia de la pèsta pneumonica o pulmonara”, un fach confirmat fa qualques jorns per l’OMS. Mas semblariá que la situacion comença d’èsser un pauc melhora pr’amor que la fin de la pèsta es ja declarada dins mai de 30 districtes e la malautiá demòra activa sonque en 9.
 
Lo nombre de personas que son a l’espital a baissat de 106 a solament 27 pendent la darrièra semana e, en consequéncia, l’OMS sostenguèt la crida a la tranquillitat facha pel govèrn de l’illa. Totun,  tanben demandèt de totjorn susvelhar la situacion “e pensar que i a d'escasenças de tornar aver mai de cases de pèsta abans lo mes d’abril de 2018”, perque plusors cases foguèron trobats abans l’epòca abituala e tanben perque la malautiá es intrada dins las grandas vilas, sustot dins la capitala, Antananarivo, una de las zònas ont s'es enregistrat mai de cases.
 
 
Apèl governamental a la tranquillitat
 
D'agéncias internacionalas d'informacions, coma EFE, an confirmat que lo ministre del torisme, Roland Ratsiraka, assolidèt que i aviá pas cap de rason per refusar de vesitar l’illa e que lo programa governamental capitava ben dins sa lucha contra la pèsta. De mai, plusors membres dels govèrns de las illas Maurici e Seichèlas e tanben de l’Organizacion Mondiala del Comèrci vesitèron fa gaire Madagascar per mostrar lor sosten al govèrn de l’illa.
 
Lo secretari general de l’OMC, Taleb Rifai, tanben volguèt soslinhar lo messatge de l’OMS en tot  “confirmar que lo risc de propagacion internacionala d’aquela malautiá es bas”. D’autre latz, una autra agéncia d'informacions, Europa Press, confirmèt que las escòlas tornarián dobrir lors pòrtas lo diluns 20 de novembre que ven e que lo Ministèri de la Santat de l’illa aviá demandat als professors  de prene totas las precaucions en detectar quin simptòma de pèsta que foguèsse. Ça que la, las universitats de Madagascar restaràn barradas.
 
 
 
 
Christian Andreu
 
 
 
 





 
 

Leave a Reply

Your email address will not be published. Required fields are marked *