Notícies Slider

Maria Vergés, naua Sindica d’Aran

  • Dempús dera renóncia deth Sindic Boya pr’amor deth sòn nomenament coma Secretari Generau entath Rèpte Demografic, eth Plen deth Conselh Generau d’Aran a escuelhut aué a Maria Vergés, qu’actuaument ocupaue era vicesindicatura prumèra, coma Sindica d’Aran

Aguesta setmana, er enquiara Sindic d’Aran, Francés Boya, siguec nomenat peth Conselh de Ministres Secretari Generau entath Rèpte Demografic, un nomenament incompatible damb es foncions de sindicatura. Per aguest motiu, ena session extraordinària deth Plen deth Conselh Generau d’Aran celebrada aué, Boya a presentat era sua renóncia ath cargue e, era enquia ara vicesindica prumèra, Maria Vergés, a estat escuelhuda coma naua Sindica d’Aran.

“Entà jo, coma aranesa, ei un gran aunor poder assomir aguest cargue e ac hèsqui damb eth madeish compromís e responsabilitat qu’è auut enquiara coma vicesindica e conselhèra”, a assegurat era Sindica d’Aran, Maria Vergés, en tot híger que: “aguesta a estat ua decision fòrça meditada e compartida damb toti es conselhèrs e conselhères de govèrn e non comportarà ua reestructuracion deth govèrn deth Conselh Generau d’Aran, mès enlà de quauque reajust. Pera mia part, seguirè mantenguent es mies responsabilitats enes airaus qu’enquia ara è gestionat directament”.

Es principaus projèctes dera legislatura, a afirmat era Sindica d’Aran, “coma ei eth cas dera candidatura dera Val d’Aran coma Resèrva dera Biosfèra, eth projècte de sostenibilitat toristica dotat peth Govèrn der Estat damb 2,5 milions d’euròs, era estrategia de gestion forestau que se demore poder implementar en 2021, eth HUB d’innovacion en territòris de montanha que lèu daurirà es sues pòrtes e tot eth trabalh realizat en airau sanitari en aguesti moments tant complicadi, son projèctes dejà encaminadi e enes qu’eth govèrn d’Aran contunharà trabalhant entà implementar-les e hèr era vida des aranesi e araneses mès facila”.

Boya a afirmat pera sua part que conservarà eth sòn compromís damb eth Govèrn d’Aran coma conselhèr, en tot dar supòrt enes airaus qu’an depenut d’eth, coma ei eth cas des departaments Pompièrs-Emergéncies e Naues Tecnologies e Innovacion.

En aguest sens, a afirmat que: “era Sindica d’Aran compdarà damb tot eth mèn supòrt entà dar seguiment as rèptes plantejadi e, per descompdat, tota era equipa de govèrn contunharà auent era mia ajuda entà tot çò que sigue de besonh”, e a hijut que: “era Secretaria Generau entath Rèpte Demografic ei tanben ua grana oportunitat entà dar supòrt as projèctes iniciadi peth Conselh Generau entà convertir era Val d’Aran en un territòri referent en airau dera innovacion enes zònes ruraus e de montanha. Eth mèn compromís damb Aran se manten e se mantierà tostemp”.

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies