Notícies

Meritxell Borràs: “Aran serà çò qu’es aranesi decidiràn”

Dissabte passat, en encastre dera Hèsta d’Aran, se signèc en Vielha er acòrd de finançament deth Conselh Generau d’Aran corresponent a 2017. Atau, era Generalitat de Catalonha transferís enguan 23 474 428 èuros ath Govèrn d’Aran entar exercici des sues competéncies pròpries, çò arrepòrte VilaWeb. Aquera chifra ei d’apròp d’un milion e miei d’èuros mès nauta qu’er an passat, mès çò de mès arremercable ei qu’aqueth acòrd se signe en junh, se tiem en compde qu'en d’autes escadences era signatura arribe ena fin der an.
 
Borràs que participèc enes actes institucionaus dera Hèsta nacionau a on defenec eth dret de decidir des pòbles: “En horcadís istoric de Catalonha, Aran serà çò qu’es aranesi decidiràn”, çò diguec.
 
En aguest sense Borràs defenec eth dret de decidir d’Aran:
 
“Ètz un pòble qu’auetz exercit e defenut eth vòste autogovèrn e ètz ua realitat nacionau gràcies ara gent d’Aran, qu’ath long des ans auetz mantengut era vòsta identitat, era vòsta lenga e era vòsta cultura”.
 
De hèt, eth Parlament de Catalonha ja arreconeishec eth dret ara autodeterminacion d’Aran en mai de 2013.
 
Borràs qu’arremerquèc que damb er acòrd signat dissabte, eth govèrn culmine eth desplegament economic derivat dera lei deth regim especiau d’Aran e mòstre qu’er engatjament de Catalonha damb Aran ei “plen e respectuós”. Deth sòn costat, eth Sindic Barrera qu’avalorèc plan positivaments era collaboracion e era intercompreneson que i a entre es govèrns aranés e catalan.
 
 
Mesures urgentes tara lengua
 
Pendent era celebracion, es conselhèrs d’Aran que parlèren deth besonh urgent de trabalhar entà arturar era davalada der usatge sociau der occitan. En aguest sens, eth Sindic Barrera anoncièc qu’eth Conselh Generau va a “hèr un front comun” damb era tòca “d’activar er usatge sociau der aranés, qu’eth miracle qu’encara era nòsta lengua se parle non sigue un miracle senon que vage estant un hèt absoludaments consolidat”.
 
Er usatge sociau dera lengua occitana en Aran a experimentat ua fòrta davarada darrèraments, çò qu’a desvelhat eth chepic des conselhèrs aranesi. “Era realitat sociau mos pòrte a prene decisions urgentes” çò precisèc Barrera.
 
 
 
Ara seguida que podètz veir er arreportatge d’Aué TV sus era Hèsta d’Aran.

 

 
 
 
 
 
FM
 
 



 

Leave a Reply

Your email address will not be published. Required fields are marked *