Notícies

Montpelhièr: la revolucion de las bicicletas aurà lèu un an

A Montpelhièr, la bicicleta es al centre del debat public. De paraulas malaürosas del cònsol màger de la vila dichas arunan an donat de vam als ciclistas locals, que se son mobilizats, çò rapòrta Libération.
 
Lo 20 d’octòbre de l’an passat, lo cònsol màger montpelhierenc, Philippe Saurel, diguèt davant las camèras de la television, a prepaus de las pistas ciclablas, que “far una infrastructura per que [foguèsse] utilizada per doas personas [èra] benlèu pas l’ideal”. A partir d’aquel moment espeliguèt amb fòrça vam una campanha suls rets socials nomenada #JeSuisUnDesDeux (soi un dels dos). Tres setmanas puèi, 1500 ciclistas manifestavan davant l’ostal de la comuna. Aquel 10 de novembre es marcat sul calendièr coma la data de l’irrupcion del movement ciclista de Montpelhièr e se commemorarà al Clapàs e endacòm mai. Ara l’usatge de la bicicleta es vengut un enjòc politic de la capitala del Bas Lengadòc.
 
A l’ora d’ara, los ciclistas montpelhierencs tenon un lògo qu’imbrica doas bicicletas e una aplicacion collaborativa sonada Vǐgǐlo, que cartografia en temps real lo ret ciclable de la vila e permet de denonciar publicament de disfoncionaments coma la fin brutala d’una pista, de veituras mal pargadas, l’abséncia de pista ciclabla...
 
En mai d’aquò, durant la marcha pel clima i aguèt una massissa manifestacion sus una granda avenguda reputada perilhosa pels ciclistas. “Montpelhièr l’an bastida per la veitura, puèi pel tram. La bicicleta es estada amagada. Un enfant pòt pedalar fins a son escòla, en seguretat, acompanhat de son grand? La responsa es non”, çò planh Nicolas Le Moigne, pòrtavotz de l’associacion Vélocité que promòu l’usatge de la bicicleta al Clapàs. “Ça que la, aicí la demanda es fòrta: la vila aculhís fòrça estudiants, es plata e gaudís d’un climat excellent”.
 
Ara Saurel s’es engatjat a condicionar rapidament de pistas ciclablas sus las avengudas reputadas perilhosas pels ciclistas e a dich qu’anava investir 95 milions d’èuros sus dètz ans per facultar la vida vidanta dels ciclistas.
 
Mentretant, l’irrupcion dels ciclistas, que semblan d’èsser mai que dos, a plan capitat, se prenèm en compte que totes los candidatsa a las eleccions municipalas montpelhierencas èran presents –o representats─ lo 20 de setembre passat, a la conferéncia que l’organizèt l’associacion Vélocité consagrada a la plaça de la bicicleta en vila.

 
 
 


 

Leave a Reply

Your email address will not be published. Required fields are marked *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies